Восеъ: истеҳсоли маҳсулоти саноатӣ рӯ ба афзоиш аст

ВОСЕЪ, 29.08.2017 /АМИТ «Ховар»/. Дар ноҳияи Восеъ 27 адад  корхонаҳои хурду  миёнаи  саноатӣ  фаъолият менамоянд, ки  қисми зиёди онҳо  ба коркарди  ашёи хоми маҳаллӣ  нигаронида шудаанд.

Бино ба иттилои  мудири бахши  рушди иқтисод  ва савдои Мақомоти ичроияи ҳокимияти давлатии ноҳия Суҳроб Азимов,    17 адади ин корхонаҳо ба таври мавсимӣ  фаъолият намуда, истеҳсоли маҳсулотро сол аз сол  зиёд менамоянд.  Дар корхонаҳои саноатӣ  асосан  коркарди пахта, истеҳсоли намаки ошӣ, масолеҳи сохтмонӣ, маҳсулоти хӯрокворию қаннодӣ, нон ва маҳсулоти нонӣ  ба роҳ монда шудааст.

Дар ноҳия дар давоми  нимсолаи  аввали соли равон ҳаҷми истеҳсоли  маҳсулоти саноатӣ  ба 27 миллиону 694 ҳазору 700 сомонӣ расонида шуд, ки  нисбат ба ҳамин давраи соли гузашта  2 миллиону 715 ҳазору 700 сомонӣ  зиёд буда, 110,9 %-ро ташкил медиҳад.