Ҳадафи тағйиру иловаҳо муҳофизати манфиатҳои қонунии фарзандони ноболиғ мебошад

Сентябрь 25, 2017 16:26

ДУШАНБЕ, 25.09.2017 /АМИТ «Ховар»/.  Дар ҷаласаи Шӯрои Маҷлиси намояндагони Маҷлиси Олии Ҷумҳурии Тоҷикистон, ки имрӯз  таҳти раёсати Раиси Маҷлиси намояндагон Шукурҷон Зуҳуров баргузор гардид, лоиҳаҳои Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи ҳимояи ҳуқуқи истеъмолкунандагон», Қонуни Ҷумҳурии Тоҷикистон «Дар бораи ворид намудани тағйиру иловаҳо ба Кодекси ҷиноятии Ҷумҳурии Тоҷикистон» ва Қонуни Ҷумҳурии Тоҷикистон «Оид ба ворид намудани тағйирот ба Кодекси мурофиавии граждании Ҷумҳурии Тоҷикистон» мавриди баррасӣ қарор гирифтанд.

Мувофиқи маълумоти хадамоти матбуоти Парлумони мамлакат, дар ҷаласаи Шӯро таъкид гардид, ки лоиҳаи Қонуни Ҷумҳурии Тоҷикистон «Дар бораи ворид намудани тағйиру илова ба Кодекси ҷиноятии Ҷумҳурии Тоҷикистон» бо тартиби ҳуқуқи ташаббуси  қонунгузорӣ аз тарафи Ҳукумати Ҷумҳурии Тоҷикистон пешниҳод шудааст.

«Лоиҳаи мазкур бо мақсади аз байн бурдани мухолифати қонунгузорӣ ва муҳофизати манфиатҳои қонунии фарзандони ноболиғ ва падару модари ғайри қобили меҳнат, инчунин иҷрои санадҳои судӣ таҳия шудааст. Зеро таҳлилҳо нишон доданд, ки қарздорон аз муҳлати муқарраргардидаи қонун зиёдтар маблағро барои таъминоти фарзандони ноболиғ насупорида бошанд ҳам, бо супоридани як қисми ночизи он маблағ аломати саркашӣ дар кирдорашон аз байн рафта, вобаста ба ин ҳолат парвандаи ҷиноятӣ оғоз намегардад»,-афзуд манбаъ.

Тибқи лоиҳа ба моддаи 178 Кодекси ҷиноятии Ҷумҳурии Тоҷикистон илова намудани эзоҳ пешниҳод шудааст, ки мутобиқи он дар моддаҳои 177 ва 178  Кодекси мазкур бадқасдона саркашӣ  намудани падару модар аз таъминоти фарзандон ва фарзандони болиғи қобили меҳнат аз таъминоти падару модари ғайри қобили меҳнат, ҳамаи кирдорҳои қарздор, ки ба иҷро нагардидани ҳуҷҷати иҷро равона гардидааст ва он боиси ба вуҷуд омадани қарздорӣ новабаста аз давраи пардохт дар ҳаҷме, ки он дар маҷмӯъ маблағи муқаррар гардидаи пардохтро барои се моҳ ташкил медиҳад, фаҳмида мешавад.

Дар Шӯро ҳамчунин роҷеъ ба даъват намудани ҷаласаи якуми иҷлосияи чоруми Маҷлиси намояндагони Маҷлиси Олии Ҷумҳурии Тоҷикистон даъвати панҷум ва  лоиҳаи Қарори Маҷлиси намояндагони Маҷлиси Олии Ҷумҳурии Тоҷикистон «Дар бораи рўзномаи ҷаласаи якуми иҷлосияи чоруми Маҷлиси намояндагони Маҷлиси Олии Ҷумҳурии Тоҷикистон даъвати панҷум» қарори дахлдор қабул карда шуд.

Аз рӯи масъалаҳои баррасишуда раисони кумитаҳои Маҷлиси намояндагон Эмомалӣ Насриддинзода, Шариф Раҳимзода ва дигар аъзои Шӯрои Маҷлиси намояндагон андешаву пешниҳодҳои худро иброз доштанд.

Сентябрь 25, 2017 16:26

Хабарҳои дигари ин бахш

Дар Тоҷикистон ҳаҷми Маҷмуи маҳсулоти дохилӣ 18,4 миллиард сомонӣ зиёд гардид
Ҳайати парлумонии Тоҷикистон дар ҷаласаи 61-уми пленарии Ассамблеяи байнипарламентии ИДМ иштирок менамояд
Ҷаласаи навбатии Шурои Маҷлиси намояндагони Маҷлиси Олии Ҷумҳурии Тоҷикистон, даъвати ҳафтум баргузор гардид
Эҳтиром ба Рӯзи Президент эҳтиром ба давлат, миллат, Истиқлолияти давлатӣ ва сулҳу ваҳдат аст
Китоби «Президент ва ниҳоди президентӣ дар Ҷумҳурии Тоҷикистон» рӯнамоӣ гардид
Дар Маҷлиси намояндагон бахшида ба Рӯзи Президенти Тоҷикистон ҳамоиш баргузор гардид
ИҶЛОСИЯИ XVI ШУРОИ ОЛӢ ВА РӮЗИ ПРЕЗИДЕНТ. Таҳлили ҳуқуқии мафҳумҳои конститутсионӣ ва таърихии давлатдорӣ
ДАР МЕҲВАРИ СУЛҲ, ВАҲДАТ ВА СОЗАНДАГӢ. Мулоҳизаҳо оид ба рисолати таърихии Пешвои миллат муҳтарам Эмомалӣ Раҳмон
Раиси Маҷлиси намояндагон бо Сафири Беларус дар Тоҷикистон вохӯрӣ намуд
Дар иҷлосияи Маҷлиси намояндагон ба якчанд қонун тағйиру иловаҳо ворид гардид
Ҷаласаи навбатии Шурои Маҷлиси намояндагони Маҷлиси Олии Ҷумҳурии Тоҷикистон, даъвати ҳафтум баргузор гардид
Файзалӣ Идизода бо Аҳмад бин Муҳаммад Ал-Ҷарвон ба таври маҷозӣ вохӯрӣ намуд