Агентии обуҳавошиносии ҶТ: сокинону меҳмонони Тоҷикистонро дар Рӯзи Истиқлолияти давлатӣ ҳавои софу офтобӣ интизор аст

ДУШАНБЕ, 09.09.2017 /АМИТ «Ховар»/. Имрӯз, 9 сентябр,  дар тамоми ҷумҳурӣ 26-умин солгарди Истиқлолияти давлатиро  ҷашн мегиранд.  Мувофиқи маълумоти Агентии обуҳавошиносии Тоҷикистон, дар рӯзи ҷашн шаҳрвандон ва меҳмонони  мамлакатро     ҳавои бебориш ва офтобӣ интизор аст.

Бар асоси пешгӯии ин марказ, имрӯз дар Вилояти Мухтори Кӯҳистони Бадахшон ҳаво бебориш шуда, дар ғарби вилоят шабона 8-13, рӯзона 25-30 дараҷа, дар шарқи ҳамин вилоят шабона 4-1 ва рӯзона 11-16 дараҷа гарм мешавад.

Дар вилояти Хатлон ҳаво камабр шуда, дар баъзе минтақаҳо ҷангу ғубор дар назар дошта шудааст. Гармии ҳаво дар водиҳо шабона 15-20 ва рӯзона 32-37 дараҷаро ташкил медиҳад.

Ҳаво дар  вилояти Суғд тағйирёбандаи бебориш шуда, ҳарорат дар водиҳо шабона ба 14-19 ва рӯзона ба 30-35 дараҷа мерасад.

Дар шаҳру ноҳияҳои тобеи марказ низ ҳавои тағйирёбанда дар назар дошта шудааст. Ҳарорат шабона 11-16 ва рӯзона  32-37 дараҷаро ташкил медиҳад.

Дар шаҳри Душанбе ҳавои камабри бебориш пешгӯӣ шуда, шабона 11-13 ва рӯзона 32-34 дараҷа гарм хоҳад шуд.