Бархе аз масъулини соҳаи маориф бо даст задан ба амалҳои коррупсионӣ нуфузи соҳаро коста мегардонанд

ДУШАНБЕ, 19.10.2017 /АМИТ «Ховар»/. Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз боздошти ду нафар корманди соҳаи маориф хабар медиҳад.

Тавре ба АМИТ «Ховар» аз Агентии мазкур иттилоъ доданд,  ду моҳ қабл ба Раёсати Агентӣ дар шаҳри Душанбе шаҳрванд «А» бо ариза муроҷиат намуд, ки нисбат ба декани факултети омодагии дифои ҳарбии Донишкадаи тарбияи ҷисмонии Ҷумҳурии Тоҷикистон ба номи С.  Раҳимов Ҳабибулло Салимов тадбирҳои қонунӣ андешида шаванд. Зеро номбурда аз ӯ барои дохил намудани шиносаш шаҳрванд «Б» ба гурӯҳи буҷавии Коллеҷи тарбияи ҷисмонӣ 5 ҳазор сомонӣ талаб дорад.

Дар натиҷаи гузаронидани корҳои фаврӣ-тафтишотӣ номбурда дар дохили мошинаш баъди аз шаҳрванд «А» гирифтани 5000 сомонӣ дастгир карда шуд.

Ҳамчунин омӯзгори Литсейи касбии политехникии шаҳри Душанбе Хушбахт Бобокалонов бо истифодаи мақоми хизматӣ ба боварии як гурӯҳ шаҳрвандон даромада, аз онҳо барои ба ин муассиса дохил намуданашон ба сифати пора маблағи пулӣ талаб намудааст. Аз ҷумла, аз шаҳрванд С. Асадова-2000 сомонӣ, П. Саъдиева-1800 сомонӣ,  Г. Искандарова-2500 сомонӣ, Д. Сайфуллоев-1800 сомонӣ ба сифати пора талаб намуда, ин маблағҳоро гирифтааст.

Зимни гузаронидани амалиёти тафтишотӣ Х. Бобокалонов ҳангоми дар бинои Муассисаи давлатии таълимии Литсейи касбии политехникии шаҳри Душанбе аз шаҳрванд «А» гирифтани маблағи 3000 сомонӣ боздошт гардид.

Вобаста ба ҳолатҳои мазкур нисбат ба Ҳ. Салимов бо моддаи 247 қисми 3 банди «а» ва нисбат ба Ҳ.  Бобокалонов бо моддаи 247 қисми 2 бандҳои «а,в,г»-и Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, барои баррасӣ намудан ба суд ирсол карда шуд.