Дар Душанбе масъалаҳои таъмини амнияти иттилоотию озуқаворӣ матраҳ мегарданд

ДУШАНБЕ, 10.10.2017 /АМИТ «Ховар»/. Маркази миллии қонунгузории назди Президенти Ҷумҳурии Тоҷикистон тасмим гирифтааст, ки  нимаи дуюми моҳи октябр дар Душанбе дар мавзӯи «Ҳифзи сиёсию ҳуқуқии соҳибистиқлолиятии  Тоҷикистон» конфронси ҷумҳуриявии илмӣ –амалӣ баргузор намояд. Дар ин хусус ба АМИТ «Ховар» аз Маркази миллии қонунгузории назди Президенти Ҷумҳурии Тоҷикистон иттилоъ доданд.

Интизор меравад, ки дар конфронс масъалаҳои  марбут ба проблемаҳои амнияти миллӣ дар шароити ҷаҳонишавӣ, механизми таъмини ҳифзи сиёсӣ–ҳуқуқии истиқлолияти Ҷумҳурии Тоҷикистон, амнияти давлатӣ ва ҳифзи ҳуқуқии он, бехатарии ҷамъиятӣ, нақши давлат дар таъмини амнияти миллӣ,  терроризм, экстремизм ва таъмини бехатарии истиқлолияти Ҷумҳурии Тоҷикистон, масъалаҳои амнияти иқтисодӣ, экологӣ, озуқаворӣ ва иттилоотӣ дар Ҷумҳурии Тоҷикистон  аз ҷониби олимон ва коршиносон баррасӣ гарданд.