Дар «Старт ап Чойхона» 11 лоиҳаи соҳибкорони ҷавони Хатлон дастгирӣ ёфтанд

ҚӮРҒОНТЕППА, 12.10.2017 /АМИТ «Ховар»/. Дар  шаҳри Қурғонтеппа  бо  ибтикори  мақомоти иҷроияи  ҳокимияти давлатии вилояти  Хатлон,  Кумитаи  сармоягузорӣ  ва идораи амволи давлатии  ҶТ,  лоиҳаи  Барномаи рушди Созмони Милали  Муттаҳид  ва  шарикони лоиҳа  барои  ҷавонон  таҳти унвони «Старт ап Чойхона»  озмун баргузор гардид.  Тавре  созмондиҳандагони  озмун  иттилоъ  доданд,  дар он  соҳибкорони ҷавону муваффақ  имкон  пайдо намуданд, ки суҳбати озод намуда, аз таҷрибаи ҳамдигар огоҳ шаванд.

Даври  аввали  озмун  аз  муаррифии лоиҳаҳо  иборат  буд.  Ҳамагӣ 19  нафар ҷавонони  вилоят аз  шаҳру навоҳӣ  имкон пайдо намуданд, ки ба  ҳакамон  лоиҳаҳои худро муаррифӣ   намоянд.  Дар  даври  ниҳоӣ  11  лоиҳа  дастгирӣ  ёфта,  1  лоиҳа ҳарчанд  ягон ҷойро  ишғол  накард,  аммо  ба  аҳли толор  хеле  писанд  омад.

Иштирокчиёни озмун ба хулосае омаданд, ки дар  доираи лоиҳаҳои  дастгиришуда  барои соҳибкорони ҷавон  омӯзишҳо   гузаронида  шаванд. Ин амал ба  рушди соҳа  дар  байни  ҷавонон  мусоидат  мекунад.

Гулпарӣ Давлатова, танзимгари  лоиҳаи «Старт ап Чойхона»,   ки  аз  тарафи Барномаи рушди СММ  дастгирӣ мешавад,  ба  хабарнигори АМИТ «Ховар»  иттилоъ дод,  ки  баргузории озмуни мазкур  аввалин  қадам  ҷиҳати дастгирии  ҷавонон  дар  рушди соҳибкорӣ  буда,  дар  доираи  ин  лоиҳаҳо курсҳои бозомӯзӣ низ  гузаронида  мешаванд.