Интиқоли оби нӯшокӣ дар ҳудуди ноҳияҳои Исмоили Сомонӣ ва Синои шаҳри Душанбе муваққатан қатъ мегардад

ДУШАНБЕ, 10.10.2017 /АМИТ «Ховар»/. Бо мақсади гузаронидани корҳои таъмирӣ-профилактикӣ  дар истгоҳи обтаъминкунии «Фишорӣ»  ҷиҳати пешбурди корҳои  омодагӣ  ба мавсими тирамоҳу зимистони солҳои 2017-2018 интиқоли оби нӯшокӣ дар  қисмате  аз маҳаллаҳои ҳудуди ноҳияҳои Исмоили Сомонӣ ва Синои шаҳри Душанбе  қатъ мегардад.

Тавре аз Раёсати иттилоот ва робитаҳои хориҷии дасгоҳи Раиси шаҳри Душанбе ба АМИТ «Ховар» хабар доданд,   бо ҳамин сабаб  дар хиёбонҳои Рӯдакӣ (аз кӯчаи Бухоро то кӯчаи С.Ғанӣ),  Исмоили Сомонӣ, кӯчаҳои М.Турсунзода, Шевченко, Шероз, С. Носир, Шотемур, Ф. Ниёзӣ, А. Командир, М. Холов, Л. Шералӣ, Ғ. Абдулло, Азизбеков, Ф. Шаҳобов, Л. Толстой, М. Миршакар, Пушкин ва Теҳрони ноҳияи Исмоили Сомонӣ ва   маҳаллаҳои Шараф, Ал-Берунӣ, Беморхонаи клиникии ҷумҳуриявии №3 ба номи Дяков, Муассисаи давлатии «Боғи ҳайвоноти шаҳри Душанбе», КВД «Варзишгоҳи марказии ҷумҳуриявӣ», ҶДММ «Кохи Наврӯз» ва кӯчаи Варзишгарони ноҳияи Сино  интиқоли оби нӯшокӣ аз соати 23:00 рӯзи 11 октябри соли 2017 то соати 24:00 рӯзи 12 октябри соли 2017  қатъ мегардад.

Бинобар ин, мақомоти иҷроияи ҳокимияти давлатии шаҳри Душанбе  аз сокинони ноҳияҳои мазкур хоҳиш менамояд, ки миқдори зарурии  оби нӯшокиро барои як шабонарӯз захира намоянд.