«Мубориза бар зидди экстремизми динӣ ва мушкилоти коҳиш додани сатҳи тундгароӣ»-ҳамоиш дар Душанбе

ДУШАНБЕ, 14.10.2017 /АМИТ «Ховар»/ Маркази исломшиносӣ дар назди Президенти Ҷумҳурии Тоҷикистон дар ҳамкорӣ бо Институти франсиявии пажўҳишҳои Осиёи Марказӣ 12-13 октябри соли равон дар шаҳри Душанбе таҳти унвони «Мубориза бар зидди экстремизми динӣ ва мушкилоти коҳиш додани сатҳи тундгароӣ: мубодилаи таҷриба байни Тоҷикистон ва Франсия» ҳамоиш баргузор намуд.

Тавре ба АМИТ «Ховар» аз ин Марказ хабар доданд, дар кори ҳамоиши илмӣ олимону коршиносон аз Франсия, вазорату кумитаҳо ва ниҳодҳои илмӣ-таҳлилии ҷумҳурӣ иштирок варзиданд. Дар ҳамоиш 14 гузориши илмӣ ба муҳокимаи иштирокчиён пешниҳод гардид. Дар қисмати ҷаласаи умумӣ ду гузориши илмӣ- «Ифротгароии исломӣ: нуқтаи назари мақомоти франсиявӣ» – и Посел Жан-Кристоф, мушовир оид ба корҳои дини Вазорати корҳои хориҷии Франсия ва «Баъзе вижагиҳои ифротгароӣ дар соҳаи дин дар шароити Ҷумҳурии Тоҷикистон» –и Файзулло Баротзода, директори Маркази исломшиносӣ дар назди Президенти Ҷумҳурии Тоҷикистон шунида шуд. Дар ҷаласаҳои кории ҳамоиш баррасии мавзўъҳои муҳими вобаста ба масъалаи тундгароӣ ва ифротгароии динӣ мавриди муҳокима ва баҳсу мунозираҳои ҷолиб қарор гирифт.

Дар ҷамъбасти муҳокимаҳо масъулони ҳар ду ҷониб иброз намуданд, ки баргузории ҳамоиш дар заминаи платформаи сиёсати «Дарҳои кушод»-и Тоҷикистон, ки меъмори он Асосгузори сулҳу Ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мебошанд, имконпазир гардидааст ва аз он дарак медиҳад, ки ҳамкории судманди Ҷумҳурии Тоҷикистон бо кишварҳои Иттиҳоди Аврупо, аз ҷумла Франсия дар сатҳи зарурӣ ва барои ҳар ду ҷониб манфиатовар қарор дорад.