Муфтии турк табаддулоти наҳзатиҳоро маҳкум намуд

ДУШАНБЕ, 19.10.2017 /АМИТ «Ховар»/. 16 октябр вохӯрии раиси Шӯрои уламои Маркази исломии Ҷумҳурии Тоҷикистон Саидмукаррам Абдулқодирзода бо Муфтии шаҳри Истанбул доктор Ҳасан Камил Йлмаз баргузор шуд.

Зимни мулоқот оид ба масъалаҳои густариши муносибатҳои дуҷонибаи Тоҷикистону Туркия ва паҳлуҳои гуногуни он, аз ҷумла масъалаҳои динӣ табодули афкор сурат гирифт. Ҷонибҳо бо изҳори хушнудӣ аз сатҳ ва ҳолати кунунии муносибатҳои дуҷониба омодагии хешро ҷиҳати рушди минбаъдаи ҳамкории мутақобилан судманд дар мавриди ҳолати озодиҳои динӣ дар Ҷумҳурии Тоҷикистон ва тадбирҳо барои пешгирии гаравидани шаҳрвандон ба ташкилотҳои террористии наҳзат ва «ФЕТО» таъкид намуданд.

Саидмукаррам Абдулқодирзода табаддулоти нокоми давлатиро, ки 15 июли соли 2016 дар Ҷумҳурии Туркия ба амал омада буд, маҳкум намуд.

Ҳамчунин раиси Шӯрои уламои Маркази исломии Ҷумҳурии Тоҷикистон доир ба амалҳои тахрибкоронаи ташкилоти террористии ҲНИТ дар даврони ҷанги шаҳрвандӣ ва кӯшиши табаддулоти нокоми давлатие, ки моҳи сентябри соли 2015 аз ҷониби аъзои ин ҳизб амалӣ гардида буд, маълумоти муфассал пешниҳод намуд. Дар вокуниш ба гуфтаҳои Саидмукаррам Абдулқодирзода Муфтии шаҳри Истанбул доктор Ҳасан Камил Йлмаз таъкид намуд, ки муфтиёти Ҷумҳурии Туркия ҳама гуна табаддулот, аз ҷумла, табаддулоти нокоми давлатиеро, ки моҳи сентябри соли 2015 аз ҷониби Абдуҳалим Назарзода зери роҳбарии ТТЭ ҲНИТ дар Ҷумҳурии Тоҷикистон роҳандозӣ шуда буд, маҳкум менамояд.