Мулоқоти Сафири Тоҷикистон бо роҳбари ширкати Арабистони Саудӣ

ДУШАНБЕ, 10.10.2017./АМИТ «Ховар»/. Сафири фавқулода ва мухтори Ҷумҳурии Тоҷикистон дар Шоҳигарии Арабистони Саудӣ Заробиддин Қосимӣ Муҳаммад Алмуъҷил, роҳбари ширкати «Алмуъҷил Лилмашориъ» ва Муовини роҳбари бахши сайёҳии Палатаи савдои шаҳри Риёзро дар бинои сафорат ба ҳузур пазируфт. Дар ин бора ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд.

Дар мулоқот масоили вобаста ба тавсиаи ҳамкорӣ дар соҳаи сайёҳӣ баррасӣ шуд.

Муҳаммад Алмуъҷил аз таассуроти зебои сафари корӣ ва иштирокаш дар барномаи сайёҳии созмондодаи Кумитаи рушди сайёҳии назди Ҳукумати Ҷумҳурии Тоҷикистон, ширкати ҳавопаймоии «Сомон-эйр», меҳмонхонаи «Ҳаят Реҷенсӣ»-и Душанбе  ва ширкати «Скай-тур», ки аз 23-юм то 30-юми сентябри соли 2017 дар минтақаҳои гуногуни Тоҷикистон роҳандозӣ шуд, ҳикоят намуда, таъкид дошт, ки «барои ҷалби сайёҳони араб ба Тоҷикистони басо зебою дилкаш ҷаҳду талош хоҳад кард».
Изҳори бовар карда шуд, ки ҳамкории Тоҷикистону Арабистони Саудӣ дар соҳаи сайёҳӣ ривоҷ ёфта, ба густариши робитаҳои тиҷоратию сармоягузорӣ заминаи боэътимод муҳайё месозад.