Вакилони Парлумони Тоҷикистон аз хона-интернатҳои пиронсолону маъюбон дидан намуданд

ДУШАНБЕ, 6.10.2017 /АМИТ «Ховар»/. Имрӯз гурӯҳи вакилони Маҷлиси намояндагони Маҷлиси Олии Ҷумҳурии Тоҷикистон таҳти сарварии Раиси кумитаи Маҷлиси намояндагон  оид ба масъалаҳои иҷтимоӣ, оила ва ҳифзи саломатӣ Ҳилолбӣ Қурбонзода дар якҷоягӣ бо гурӯҳи кории мақомоти ваколатдори давлатӣ дар соҳаи тандурустӣ ва ҳифзи иҷтимоии аҳолӣ, маориф ва илм, муҳоҷират ва шуғли аҳолии Ҷумҳурии Тоҷикистон аз вазъи будубоши бошандагони хона-интернатҳои пиронсолон ва маъюбон, мактаб-интернатҳо барои кӯдакони маъюб дар шаҳрҳои  Душанбе, Ҳисор,  Турсунзода ва ноҳияҳои Ёвон, Рӯдакӣ ва Варзоб  дидан намуданд.

Зимни вохӯрӣ бо  бошандагони хона-интернат аъзои гурӯҳи корӣ зикр намуданд, ки хароҷоти Буҷети давлатӣ сиёсати иҷтимоӣ дошта, он, пеш аз ҳама, ҷиҳати таъмини афзалиятҳое, ки дар Паёми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон, вохӯриҳояшон бо намояндагони аҳли ҷомеа, инчунин вазифаҳое, ки аз рӯи стратегияҳо ва  барномаҳои миллӣ, дигар қарору барномаҳои Ҳукумати Ҷумҳурии Тоҷикистон бармеоянд, равона гардидааст. Аз ин рӯ ҳалли тадриҷии масъалаҳои ҳаёти иҷтимоӣ, ғамхорӣ нисбат ба ятимон, маъюбон, нафақахӯрон, пиронсолони барҷомонда ва дастгирии иҷтимоии оилаҳои камбизоат ва осебпазир яке аз самтҳои  афзалиятнок эътироф гардидааст. Давлат дар ин замина тамоми тадбирҳоро андешида истодааст, то ин гурӯҳи  осебпазири аҳолӣ худро бе пушту паноҳ ва бе ҳимоя эҳсос накунад.

Дар робита ба ин, дар соли 2017 ҳаҷми умумии хароҷоти соҳаҳои иҷтимоӣ  беш аз 9 млрд. сомониро ташкил медиҳад, ки нисбат ба нақшаи аниқшудаи буҷети соли 2016-ум  11,8 фоиз зиёд буда, 45,8 фоизи ҳаҷми умумии хароҷоти Буҷети давлатиро ташкил медиҳад.

Танҳо барои рушди соҳаи ҳифзи иҷтимоӣ бо назардошти буҷети суғуртаи иҷтимоӣ ва нафақа 3,2 млрд. сомонӣ ба нақша гирифта шудааст.

Зикр шуд, ки аз ҳисоби маблағҳои буҷетӣ дар соли 2016-ум ҷиҳати нигаҳдорӣ ва фаъолияти муассисаҳои ҳифзи иҷтимоӣ барои  кӯдакон, калонсолон, пиронсолон, маъюбон, санаторияву профилакторияҳо беш аз 34 млн. сомонӣ равона гардидааст.