«100-солагии Инқилоби Октябр»-намоиши тасвирӣ дар Осорхонаи миллӣ

ДУШАНБЕ, 11.11.2017 /АМИТ «Ховар»/. Дар Осорхонаи миллии Тоҷикистон таҳти унвони «100-солагии Инқилоби Октябр» намоиш ифтитоҳ гардид.

Тавре аз Осорхонаи миллии Тоҷикистон ба мухбири АМИТ «Ховар» иттилоъ доданд, дар ифтитоҳи намоиш сафирони Федератсияи Россия, ҷумҳуриҳои Беларус, Арманистон, Қазоқистон дар Ҷумҳурии Тоҷикистон, донишҷӯёни Донишгоҳи миллии Тоҷикистон, Донишгоҳи славянии Россияву Тоҷикистон, филиали Донишгоҳи давлатии Москва дар шаҳри Душанбе ва тамошобинон иштирок намуданд.

Тавре иттилоъ дода шуд, зимни ифтитоҳи намоиш директори Осорхонаи миллии Тоҷикистон Абдувалӣ Шарифзода ва Сафири Федератсияи Россия дар Ҷумҳурии Тоҷикистон Игор Лякин-Фролов вобаста ба Инқилоби Октябр сухан гуфтанд.

Дар намоиши мазкур зиёда аз 50 адад мавод ба тамошо гузошта шуданд. Аз ҷумла, беҳтарин мусаввараҳои рассомони Иттиҳоди Шӯравӣ, ки дар онҳо ҳодисаҳои Инқилоби Октябр инъикос шудаанд ва расмҳои ҳуҷҷатҳои ба ин ҳодисаи таърихӣ рабтдошта пешниҳоди тамошобинон гардиданд.