Академияи илмҳо Иҷлосияи 16-ро аз лиҳози илмӣ чун воситаи барқарории низоми сиёсӣ дар мамлакат муаррифӣ мекунад

ДУШАНБЕ, 08.11.2017. /АМИТ «Ховар»/. «Нақши таърихии Иҷлосияи XVI Шӯрои олии Ҷумҳурии Тоҷикистон дар рушди минбаъдаи кишвар»-таҳти чунин унвон 10 ноябри соли 2017 дар Академияи илмҳои Ҷумҳурии Тоҷикистон бахшида ба 25-умин солгарди баргузории Иҷлосияи XVI Шӯрои Олии Ҷумҳурии Тоҷикистон конференсияи ҷумҳуриявии илмӣ  баргузор мегардад.

Тавре ба хабарнигори АМИТ «Ховар» аз Академияи илмҳо хабар доданд, дар конференсия намояндагони муассисаҳои илмии кишвар иштирок намуда, воқеаи таърихиро чун воситаи барқарории низоми сиёсӣ дар мамлакат аз лиҳози илмӣ муаррифӣ хоҳанд кард.

Интизор меравад, ки аз ҷониби Академияи илмҳо дар музокирот президенти АИ ҶТ, академик Фарҳод Раҳимӣ, аъзои пайвастаи АИ ҶТ Абдуҷаббор Раҳмонзода, Кароматулло Олимов, Маҳмадюсуф Имомзода ва аъзои  вобастаи АИ ҶТ Абдураҳмон Муҳаммад, Хайриддин Идизода, Сахидод Раҳматуллозода, Лутфулло Саидмуродов ва дигарон ширкат намоянд.

Иҷлосияи XVI Шӯрои Олии Ҷумҳурии Тоҷикистон воқеан ҳам рӯйдоди таърихӣ маҳсуб меёбад. Зеро маҳз дар ҳамин иҷлосия тақдири ояндаи давлати миллии тоҷикон тарҳрезӣ гардид ва ба сӯйи ҳадафҳои бузурги умумимиллӣ — сулҳу субот ва ваҳдати миллӣ аввалин қадамҳо гузошта шуданд.

Ба ҳамин хотир мардум ба аҳамияти тақдирсози он арҷ мегузорад ва заҳмати бузургу талошҳои вакилони он давраро барои оромию субот қадрдонӣ менамояд.