Бахшида ба Иҷлосияи XVI Шӯрои Олӣ дар Хуҷанд конфронси илмӣ доир гардид

ХУҶАНД, 16.11.2017. /АМИТ «Ховар»/. Муҳимтарин  дастоварди бузурги Иҷлосияи таърихӣ интихоби Эмомалӣ Раҳмон ҳамчун фарзанди бонангу номус ва вафодори миллат, далеру шуҷоъ, покзамиру нексиришт ва дорои ҳувияти баланди миллӣ ба ҳайси Раиси Шӯрои Олии Ҷумҳурии Тоҷикистон мебошад. Роҳбари давлат дар ҳоле зимоми ҳокимиятро ба даст гирифтанд, ки халқи тоҷик дар  ҳолати яъсу ноумедӣ қарор дошта, умед ба фардои ҳаёт норавшан буд. Вазифа ва ҳадафҳое, ки пешорӯ меистоданд- пойдории давлати соҳибистиқлоли Тоҷикистон, таъмини ҳарчи зудтари сулҳу субот, нигоҳ доштани якпорчагӣ ва давлати мустақили тоҷикон маҳсуб мешуданд. Ин суханон   дар конфронси илмӣ-амалӣ таҳти унвони «Нақш ва аҳамияти Иҷлосияи 16-уми Шӯрои Олии Ҷумҳурии Тоҷикистон дар таҳкими сулҳ ва ваҳдати миллӣ» баён гардиданд.

Конфронси мазкур бахшида ба 25-солагии Иҷлосияи тақдирсоз ва Рӯзи Президенти Ҷумҳурии Тоҷикистон дар «Маркази фарҳанг»-и шаҳри Хуҷанд баргузор гардид.

Тавре ба АМИТ «Ховар» аз хадамоти матбуоти мақомоти иҷроияи ҳокимияти давлатии шаҳри Хуҷанд иттилоъ доданд, дар конфронс  раиси шаҳри Хуҷанд Маъруф Муҳаммадзода доир ба «Нақши Эмомалӣ Раҳмон дар ташаккули давлатдории навини тоҷикон» гуфт, ки Президенти мамлакат муҳтарам Эмомалӣ Раҳмон ҳамчун сиёсатмадори даврони нав дар лаҳзаи сарнавиштсоз ба саҳнаи сиёсат омада, давлати тозаистиқлоли моро аз вартаи ҳалокат, миллати тоҷикро аз парокандагию нобудшавӣ раҳониданд.
Ректори ДДХ ба номи академик Бобоҷон Ғафуров Ҷамшед Ҷӯразода, профессор Ваҳҳоб Набиев роҷеъ ба «Заминаҳои таърихии баргузории      Иҷлосияи 16-уми Шӯрои Олии Ҷумҳурии Тоҷикистон ва иштирокчии Иҷлосияи тақдирсоз Каромулло Одилов хотираҳои хешро аз лаҳзаҳои тақдирсози ин иҷлосия баён карданд.