Дар Рашт бахшида ба рӯзи қабули Конститутсия ҷаласаи тантанавӣ доир шуд

РАШТ, 04.11.2017 /АМИТ «Ховар»/. Субҳи имрӯз ба муносибати рӯзи қабули Конститутсияи Ҷумҳурии Тоҷикистон дар Коллеҷи тиббии ноҳияи Рашт бо иштироки роҳбарияти ноҳия, кормандони ҳифзи ҳуқуқ ва омӯзгорону донишҷӯён ҷамъомади тантанавӣ доир шуд. Дар ин бора хабарнигори минтақавии АМИТ «Ховар» хабар медиҳад.

Раиси ноҳия  Қаноатшо Холиқ зикр намуд, ки «Конститутсия дар худ орзуву омоли чандинасраи халқи худогоҳу хештаншиносро баҳри бунёди ҷомеаи адолатпарвар инъикос намудааст. Конститутсияи Ҷумҳурии Тоҷикистон барои устувории соҳибихтиёрӣ, пойдории ваҳдату ҳамдигарфаҳмӣ, суботи сиёсӣ, таъсиси низоми самарабахши  мақомоти ҳокимияти давлатӣ, ба миён омадани рукнҳои  ҷомеаи шаҳрвандӣ, таҳкими ғояҳои инсондӯстона дар тафаккури ҷомеа, татбиқи асли ба се шоха ҷудо шудани ҳокимият ва шинохти Тоҷикистон дар арсаи  сиёсати ҷаҳонӣ чун субъекти  комилҳуқуқи  муносибатҳои байналмилалӣ нақши созгору таърихӣ дорад».

Дар ҷамъомади тантанавӣ аз ҷониби кормандони ҳифзи ҳуқуқ, омӯзгорон ва роҳбарони ташкилоту муассисаҳо дар доираи ин санади тақдирсоз барои таҳкими пояҳои истиқлолият ва пешрафти Ҷумҳурии Тоҷикистон маърӯзаҳо шунида шуданд.

Нозири шуъбаи хадамоти  пешгирии ҳуқуқвайронкунии ноболиғон ва ҷавонони РВКД дар минтақаи Рашт Садриддин Икромов гуфт, ки «Конститутсия тамомияти арзии  мамлакат, муттаҳидӣ, озодӣ ва ҳуқуқи шаҳрвандонро  ҳимоя мекунад. Инчунин ба танзим даровардани ҳаёти шаҳрвандон дар асоси нишондодҳои  қонуни асосии мамлакат имконият медиҳад, ки ҳаёти хушбахтонаи  сокинони мамлакат таъмин гардида, дар баробари  ин  барои ободиву сарсабзиҳои давлати соҳибистиқлоламон заминаи устувор гузошта шавад».