Дар Вазорати корҳои дохилӣ оид ба вусъат бахшидани ислоҳоти милитсия мулоқот доир гардид

ДУШАНБЕ, 24.11.2017. /АМИТ «Ховар»/. Дирӯз Вазири корҳои дохилӣ, генерал-полковники милитсия Рамазон Раҳимзода бо Сафири Дафтари Барномавии САҲА дар Ҷумҳурии Тоҷикистон хонум Туула Юреля оид ба вусъат бахшидани ҳамкории дуҷониба дар самти ислоҳоти милитсия вохӯрӣ баргузор намуд.

Дар вохӯрӣ ҳамчунин сардори Департаменти ҳарбӣ-сиёсии Дафтари барномавии САҲА дар Душанбе Фейзо Нуманаи, мушовир оид ба масъалаҳои мубориза бо терроризм ва ислоҳоти милитсия Дмитрий Капортсев иштирок намуданд.
Зимни вохӯрӣ зикр гардид, ки дар самти ислоҳоти милитсия се ҳуҷҷати муҳим: Стратегияи ислоҳоти милитсия барои солҳои 2013-2020, Барномаи рушди ислоҳоти милитсия ва Нақшаи амаликунонии ислоҳоти милитсия барои солҳои 2013-2020 таҳия ва қабул карда шудаанд.

Бояд тазаккур дод, ки нахустин санад дар бораи азми ислоҳоти милитсия – «Ёддошти тафоҳум оид ба ислоҳоти милитсия» ҳанӯз 8 апрели соли 2011 байни Ҳукумати Ҷумҳурии Тоҷикистон ва Созмони Амният ва Ҳамкорӣ дар Аврупо ба имзо расида буд.

Тибқи ислоҳоти милитсия бо Қарори Ҳукумати Ҷумҳурии Тоҷикистон Ҳамоҳангсози миллӣ оид ба ислоҳоти милитсия роҳандозӣ гардид, ки яке аз кормандони пуртаҷриба дар ин самт фаъолият дорад.

Сафири Дафтари Барномавии САҲА дар Ҷумҳурии Тоҷикистон хонум Туула Юреля изҳор дошт, ки «ман пеш аз ҳама ба мақомоти корҳои дохилӣ барои ҳамкории сатҳи баланд бо Бюрои САҲА дар Тоҷикистон арзи сипос менамоям. Тӯли якчанд соле, ки САҲА бо Вазорати корҳои дохилӣ дар самти ислоҳоти милитсия ҳамкорӣ дорад, ба натиҷаҳои назаррас ноил гардидаанд. Мо минбаъд низ ҳамкории худро дар амалисозии ислоҳоти милитсияи Ҷумҳурии Тоҷикистон идома дода, кумаку дастгирии худро дареғ намедорем».

Дар хотима ҷонибҳо изҳор доштанд, ки ин мулоқот дар самти ислоҳоти милитсия барои мақсади асосӣ – ислоҳот ва фаҳмиши ҷамъиятии куллан симои нави ҷомеа, имиҷи корманди милитсия, ки барои расонидани кумак ба шаҳрвандон равона гардидааст, заминаи мустаҳкам барои рушди ҳамкории минбаъда хоҳад буд.