Конститутсия чун санади муҳими ҳуқуқӣ барои татбиқи ҳадафҳои нек ва пешрафти давлати муосир асос гузошт

ДУШАНБЕ, 03.11.2017 /АМИТ «Ховар»/. Дар қисми низомии 3501-и Вазорати корҳои дохилии Ҷумҳурии Тоҷикистон дар шаҳри Хуҷанд бахшида ба Рӯзи Конститутсия мулоқот баргузор шуд.

Тавре аз Хадамоти матбуоти раиси вилояти Суғд хабар доданд, дар мулоқот устоди Донишкадаи иқтисод ва савдои Донишгоҳи тиҷорати Тоҷикистон  Каёнуш Калонов, мутахассиси шуъбаи рушди иҷтимоӣ ва робита бо ҷомеаи дастгоҳи раиси шаҳри Хуҷанд Фирдавс Маҳмадалиев  доир ба таърихи қабули Конститутсия ва нақши он дар ҷомеаи демократӣ сухан намуданд. Зикр гардид, ки Конститутсияи Тоҷикистон ба марҳалаи нави таърихии гузариш аз ҷомеаи собиқ сотсиалистӣ ба давлати ҳуқуқбунёди иҷтимоӣ ва ҷомеаи озоди шаҳрвандӣ заминаи боэътимоди ҳуқуқӣ гузошта, барои муайян намудани асосҳои сохтори конститутсионӣ, таҳкими ҳокимияти давлатӣ, самтҳои ҷараёни инкишофи ҷомеа, бунёди давлатдории навин заминаи воқеӣ гузошт.

Дар заминаи он рушди бемайлони давлат, вазъи муътадили сиёсӣ ва амнияти ҷомеа, ҳифзи манфиатҳои миллӣ, таҳкими қонунияту тартиботи ҳуқуқӣ, ҳимояи ҳуқуқу озодиҳои инсон ва шаҳрванд таъмин карда шуд.

Зикр шуд, ки Қонуни асосии кишвар, ки дар марҳилаи басо мураккаби сиёсии рӯзҳои аввали ташак­кули давлати мустақил қабул гардид, бузургтарин дастоварди даврони соҳибистиқ­лолии кишвар маҳсуб ёфта, ҳамчун санади муҳими ҳуқуқӣ ва ҳуҷҷати сарнавиштсоз барои амалӣ намудани ҳадафҳои неки созандаи пешрафту тараққиёти давлати муосир асос гузошт.

Роҳбарияти қисми низомӣ баргузор гардидани чунин мулоқотро амали саривақтӣ арзёбӣ намуда, зикр сохтанд, ки он барои баланд гардидани дониши сиёсии сарбозон мусоидат менамояд.