Қосим Роҳбар, Раиси Кумитаи рушди маҳал: «Парчами давлатӣ симои Тоҷикистонро дар ҷаҳон ҳамчун давлати соҳибистиқлол, муқтадир, бофарҳанг ва соҳибтамаддун муаррифӣ менамояд”

ДУШАНБЕ, 24.11.2017 /АМИТ «Ховар»/. Имрӯз дар Кумитаи рушди маҳали назди Президенти Ҷумҳурии Тоҷикистон бо иштироки раиси Кумита Қосим Роҳбар ва ҳайати кормандони Кумита бахшида ба рӯзи Парчами миллӣ ҷамъомади тантанавӣ баргузор шуд. Зимни ҷамъомад раиси Кумита Қосим Роҳбар иброз намуд, ки “ҷашни Парчам аз зумраи он ҷашнҳоест, ки имрӯз симои Тоҷикистонро ҳамчун давлати соҳибистиқлол, муқтадир, бофарҳанг ва соҳибитамаддун дар ҷаҳон муаррифӣ менамояд. Таҷрибаи гузаштаи миллати тоҷик агар аз як тараф боиси ифтихори халқи тоҷик бошад, аз тарафи дигар, асоси ҳастӣ ва пойдории давлатдории ин миллати соҳибтамаддун аст. Парчам дар тӯли таърихи миллати тоҷик нақш ва рисолати муҳим дошт”.

Асосгузори сулҳу Ваҳдати миллӣ – Пешвои миллат, Президенти мамлакат муҳтарам Эмомалӣ Раҳмон бо нишони эҳтирому садоқат ба Парчами миллиамон бо фармони худ аз 20 ноябри соли 2009 24 ноябрро Рӯзи Парчами давлатии Ҷумҳурии Тоҷикистон эълон доштанд. 30 августи соли 2011 дар маркази шаҳри Душанбе Парчами давлатии Ҷумҳурии Тоҷикистон дар пояи 165 м, ки баландтарин дар ҷаҳон аст, парафшон гардид. Баландии худи Парчам 30 м ва дарозии он 60 м мебошад.

Парчами давлатии Ҷумҳурии Тоҷикистон, ки имрӯз ҳамчун як рамзи давлатӣ шинохта шудааст, албатта, дар заминаи хушку холӣ ба миён наомадааст. Зимни омода намудани он аз сарчашмаҳои хеле зиёди фарҳангӣ истифода шудааст. Аз ин рӯ, мардуми мо ба асолати таърихӣ ва таъсири маънавии Парчами давлатӣ ҳамчун як зуҳуроти бисёр муҳиму арзишманди миллӣ эътиқод ва эътимод пайдо карданд.