Озмун барои муайян кардани беҳтарин хонандагони китобҳои Пешвои миллат

ДУШАНБЕ, 16.11.2017 /АМИТ «Ховар»/. Кумитаи иҷроияи Ҳизби Халқии Демократии Тоҷикистон дар шаҳри Душанбе тасмим гирифтааст, ки бахшида ба Рӯзи Президенти Ҷумҳурии Тоҷикистон озмуни хонандаи беҳтарини китобҳои Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро роҳандозӣ намояд.

Тавре дар ин бора ба АМИТ «Ховар» мудири шуъбаи таблиғот ва иттилооти Кумитаи иҷроияи Ҳизби Халқии Демократии Тоҷикистон дар ноҳияи Исмоили Сомонӣ  Хайём Амонов иттилоъ дод, озмуни мазкур се марҳиларо дар бар гирифта, даври аввали он дар муассисаҳои миёна  ва олии касбӣ доир мегардад.

Даври дуюм дар сатҳи ноҳиявӣ ва марҳилаи сеюм дар сатҳи ҷумҳуриявӣ гузаронида мешавад.

Ба иттилои Хайём Амонов, ҳадаф аз баргузории  озмун ҷалби бештари ҷавонон ба омӯзиши осори Пешвои миллат  бо мақсади ташаккули тафаккури сиёсиву ҷаҳонбинӣ, баланд бардоштани савияи дониши ҳукуқиву ҳисси ватанпарастиву ватандӯстӣ, худшиносии милливу худогоҳӣ, инчунин пешгирии ҷавонон аз тақлиди фарҳанги бегона мебошад.

Дар марҳилаи сеюм ғолибон  бо туҳфаҳои Раиси шаҳри Душанбе ва раисони ноҳияҳо қадрдонӣ шуда, ғолиби ҷои аввал ба Ҷумҳурии Мардумии Чин равон карда мешавад.