Сироҷиддин Аслов дар Вохӯрии вазирони корҳои хориҷии кишварҳои Осиёи Марказӣ ва Иттиҳоди Аврупо иштирок ва суханронӣ намуд

ДУШАНБЕ, 10.11.2017./АМИТ «Ховар»/. Имрӯз дар шаҳри Самарқанди Ҷумҳурии Ӯзбекистон Вохӯрии навбатии вазирони корҳои хориҷии кишварҳои Осиёи Марказӣ ва Иттиҳоди Аврупо баргузор гардид. Дар кори он вазирони корҳои хориҷии кишварҳои Осиёи Марказӣ ва Намояндаи Олии Иттиҳоди Аврупо оид ба корҳои хориҷӣ ва сиёсати амниятӣ Федерика Могерини ширкат варзиданд. Дар ин бора ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд.

Зимни Вохӯрӣ иштирокчиён як қатор масъалаҳо, аз ҷумла ҳамкории минтақавӣ ва амният, рушди иқтисодии минтақаи Осиёи Марказӣ, дурнамои муносибатҳои кишварҳои Осиёи Марказӣ бо Иттиҳоди Аврупо, инчунин дигар мавзӯъҳои минтақавӣ ва байналмилалиро муҳокима намуданд. Вазирон бар аҳамияти идомаи ҳамкории кишварҳои минтақа бо Иттиҳоди Аврупо ҷиҳати тақвияти зарфиятҳои иқтисодӣ, транзитӣ ва нақлиётии кишварҳои Осиёи Марказӣ тавассути татбиқи бомуваффақияти барномаҳои беҳтарсозии фазои сармоягузорӣ, таъмини болоравии устувори иқтисодӣ, мудирияти самараноки сарҳадот, рушди захираҳои инсонӣ тариқи таҳкими сифати таҳсилот, дастгирии соҳибкории хурду миёна ва шуғли аҳолӣ таъкид намуданд.

Дар Воҳурӣ Вазири корҳои хориҷии Ҷумҳурии Тоҷикистон Сироҷиддин Аслов иштирок ва суханронӣ намуд.

Дар фарҷоми Вохӯрӣ вазирон Баёнияи муштарак қабул намуданд.