«Ҷавонон — ояндаи миллат»-конфронс дар Донишгоҳи Федералии Урал

ДУШАНБЕ, 21.12.2017 /АМИТ «Ховар»/. Имрӯз дар доираи сафари ҳайати кории кормандони мақомоти корҳои дохилӣ ва ҷавонони гурӯҳи «Авангард» ба шаҳри Екатеринбурги Федератсияи Россия дар Донишгоҳи Федералии Урал (УРФУ) бо донишҷӯёни тоҷик дар мавзӯи «Ҷавонон — ояндаи миллат» конфронси илмӣ-назариявӣ баргузор гардид.

Тавре аз Вазорати корҳои дохилии Ҷумҳурии Тоҷикистон ба АМИТ «Ховар» хабар доданд, дар кори он сардори Хадамоти пешгирии ҳуқуқвайронкунӣ байни наврасону ҷавонони Вазорати корҳои дохилӣ Абдусаттор Фаттоҳзода, сардори маркази матбуоти вазорат Умарҷони Эмомалӣ, гурӯҳи ҷавонони «Авангард» ва донишҷӯёни фаъол дар мавзӯъҳои баланд бардоштани ҳувияти миллӣ, арҷгузорӣ ба арзишҳои миллӣ ва ватандорию ватанпарастӣ сухан гуфтанд.

Бояд гуфт, ки имрӯзҳо бо дастгирии бевоситаи Президенти Ҷумҳурии Тоҷикистон муҳтарам Эмомалӣ Раҳмон зиёда аз 30 ҳазор донишҷӯёни тоҷикистонӣ дар донишгоҳҳои олии давлатҳои ҷаҳон дар риштаҳои гуногун таҳсил менамоянд.

Ба иттилои манбаъ, намояндагони Вазорати корҳои дохилии Ҷумҳурии Тоҷикистон ва ҷавонони фаъол дар масҷиди ба номи Имоми Аъзами шаҳри Екатеринбурги Федератсияи Россия бо намозгузорон вохӯрӣ доир намуда, ҷиҳати пешгирии шомилшавии ҷавонон ба гурӯҳҳои иртиҷоӣ суҳбати озоду самимӣ доир намуданд.