Аз Паём то Паём: Кумитаи рушди сайёҳии назди Ҳукумати Ҷумҳурии Тоҷикистон таъсис дода шуд

ДУШАНБЕ, 18.12.2017 /АМИТ «Ховар»/.  Президенти Ҷумҳурии Тоҷикистон  муҳтарам Эмомалӣ Раҳмон дар  Паёми имсолаашон ба Маҷлиси Олӣ  ба масъулин ҷиҳати дар тӯли панҷ соли аввали фаъолият аз андози фоида озод кардани ширкатҳои навтаъсиси сайёҳӣ, аз андоз аз арзиши иловашуда ва боҷи гумрукӣ озод намудани воридоти таҷҳизот ва маводи сохтмонӣ барои бунёди иншооти сайёҳӣ, аз ҷумла, меҳмонхона, осоишгоҳ, истироҳатгоҳу табобатгоҳ, марказҳо ва дигар иншооти сайёҳӣ супориш дода буданд.

Тавре раиси Кумитаи рушди сайёҳӣ Нуъмон Абдуғаффорзода иброз дошт,  дар асоси ин дастуру супоришҳои  Пешвои миллат як зумра иншооти бузурги инфрасохтории сайёҳӣ, аз ҷумла, Маҷмааи сайёҳию лижаронии «Сафеддара», истироҳатгоҳҳои «Баҳористон», «Пули сангин», маҷмааи «СПА Ҳаёт», меҳмонхонаҳои бренди ҷаҳонии панҷситорадор, марказҳои сайёҳӣ, боғу гулгаштҳои фарҳангию саёҳатӣ ба истифода дода шуданд.
Дар ҳамин замина  соли равон   Кумитаи рушди сайёҳии назди Ҳукумати Ҷумҳурии Тоҷикистон таъсис дода шуд.
Чанде пеш Кумитаи мазкур портали миллии сайёҳӣ фаъол намуд, ки  он барои  расонидани маълумоти пурра ва саҳеҳ ба сайёҳони дохилию хориҷӣ мусоидат менамояд.

Портали миллии сайёҳии Тоҷикистон бо забонҳои тоҷикӣ, русӣ ва англисӣ омода карда шуда, дар оянда бо забонҳои дигари хориҷӣ низ таҳия мешавад. Ин портал фарогири тамоми иттилооти зарурӣ оид ба имкониятҳои сайёҳии Тоҷикистон, қоидаҳои будубош, дастрас намудани раводид, фарҳангу таърих ва анъанаҳои миллӣ, ширкатҳои сайёҳӣ, иқлим, осоишгоҳу истироҳатгоҳҳо, хатсайрҳои ҳавоӣ, ҳунарҳои дастию армуғонҳо ва дигар маълумоти муҳим мебошад.

Дар портал айни замон зиёда аз 20 ширкати сайёҳӣ, осоишгоҳҳо, ширкатҳои ҳавопаймоӣ, меҳмонхонаҳо ҷой дода шудаанд, ки тавассути онҳо сайёҳон ва дигар ҳавасмандон метавонанд мустақиман ба сомонаи ин ширкатҳо ворид шаванд.

Хотиррасон менамоем, ки   Тоҷикистон узви комилҳуқуқи Созмони ҷаҳонии сайёҳӣ гашта, аз соли 2007 инҷониб заминаи меъёрии ҳуқуқии соҳа бо қабул ва татбиқи қонунҳои Ҷумҳурии Тоҷикистон «Дар бораи туризм», «Дар бораи сайёҳии дохилӣ», Консепсияи рушди туризм, Барномаи рушди туризм ва дигар санадҳо  таҳким ёфтааст.
Бояд зикр кард, ки давлату Ҳукумати Тоҷикистон ҷиҳати рушди  соҳаи сайёҳии мамлакат  пайваста  талош доранд, то  он  ба яке аз бахшҳои сердаромади иқтисоди миллӣ мубаддал гардад.