Б. Ҷалиловро барои анҷом додани амалиёти ғайриқонунӣ бо асъори хориҷӣ ҷарима карданд

ДУШАНБЕ, 25.12.2017 /АМИТ «Ховар»/. Суди шаҳри Ҳисор шаҳрванд Баҳодур Ҷалиловро бо моддаи 286 қисми 2 Кодекси  ҷиноятӣ  гунаҳкор дониста, ба ӯ ҷазо дар  намуди ҷарима ба андозаи 730 нишондиҳанда барои ҳисобҳо, баробар ба 36 ҳазору 500 сомонӣ таъйин кард.

Тавре маркази матбуоти Прокуратураи генералии Ҷумҳурии Тоҷикистон хабар медиҳад, номбурда барои он айбдор дониста мешавад, ки бе иҷозатномаи махсуси Бонки миллии Тоҷикистон ба муомилоти ғайриқонунӣ бо асъори хориҷӣ бо роҳи хариду фурӯши он машғул шудааст. «Ӯ бо мақсади ба даст овардани фоидаи муфт   4000 доллари ИМА-ро ба маблағи умумии 35 ҳазору 220 сомонӣ бо шаҳрванд А. нархгузорӣ намуда, аз номбурда 4000 доллари ИМА харида, бар ивази он  35 ҳазору 220  сомониро фурӯхтааст», -зикр кардааст манбаъ.

Ба иттилои Прокуратураи генералӣ, ин амал 17 сентябри соли 2017 дар нуқтаи фурӯши  ашёи мактабӣ, ки дар бозори марказии “Самоҳ”-и шаҳри Ҳисор воқеъ аст, сурат гирифтааст.