«Коррупсия зуҳуроти номатлубест, ки эътимоди мардумро ба давлат коста мегардонад» — ҳамоиш дар Суди Олии иқтисодӣ

ДУШАНБЕ, 25.12.2017 /АМИТ «Ховар»/. Имрӯз дар Суди Олии иқтисодии Тоҷикистон бо иштироки роҳбарият, судяҳо, кормандони дастгоҳи судҳои иқтисодии ҷумҳурӣ ва намояндагони Агентии назорати давлатии молиявӣ ва мубориза бо коррупсия дар мавзӯи «Пешгирии омилҳои коррупсионӣ дар судҳои иқтисодӣ» ҷамъомад баргузор гардид.

Мавриди зикр аст, ки Пешвои миллат муҳтарам Эмомалӣ Раҳмон дар Паёмашон ба Маҷлиси Олӣ таъкид намуданд, ки «коррупсия зуҳуроти номатлубест, ки эътимоди мардумро ба давлат коста гардонида, обрӯву эътибори онро коҳиш медиҳад, барои рушди иқтисодиёти пинҳонӣ ва истифодаи ғайримақсадноки маблағҳои давлативу ҷамъиятӣ шароит фароҳам оварда, дар маҷмӯъ, боиси поймолшавии ҳуқуқи инсон ва заиф шудани пояҳои ахлоқии ҷомеа гардида, яке аз монеаҳои ҷиддии пешрафти ҷомеа мебошад».

Раиси Суди Олии иқтисодӣ Мавлуда Қаландарзода зимни маърӯза ба суханони Пешвои миллат такя карда, изҳор намуд, ки афзудани ҷиноятҳои коррупсионӣ соли равон дар мақомоти судӣ боиси нигаронист.

Мубориза бо коррупсия самти муҳими сиёсати давлатии роҳбарияти Ҳукумат муайян шудааст ва дар ин самт заминаҳои ҳуқуқиву сохторӣ ташаккул ёфта, ҳамкории байналмилалӣ роҳандозӣ шудаанд. Аз ҷумла, Фармони Президенти Ҷумҳурии Тоҷикистон оид ба тасдиқ намудани «Стратегияи муқовимат ба коррупсия дар Ҷумҳурии Тоҷикистон барои солҳои 2013-2020» яке аз тадбирҳои асосии ташаккули сиёсати давлатии зиддикоррупсионӣ дар кишвар ба ҳисоб меравад.

Бояд зикр кард, ки дар Паёми навбатии Президенти Ҷумҳурии Тоҷикистон 22 декабри соли 2017 таъкид гардид, ки диққати сохтору мақомоти давлатӣ ва аҳли ҷомеа мунтазам ба масъалаи пурзӯр намудани мубориза бо коррупсия ҷалб мегардад, зеро бо вуҷуди тадбирҳои дар ин самт андешидаи Ҳукумат ҳанӯз ҳам ҳолатҳои содиршавии амалҳои коррупсионӣ кам нестанд.

Аз ин лиҳоз, Президенти мамлакат ба роҳбарони вазорату идораҳо, бахусус, мақомоти ҳифзи ҳуқуқ, мақомоти иҷроияи маҳаллии ҳокимияти давлатӣ ва худидоракунии шаҳраку деҳот супориш доданд, ки интихоб ва ҷобаҷогузории кадрҳоро танҳо тавассути озмун ба роҳ монда, барои тоза кардани сафи мақомот аз шахсони тасодуфӣ, риояи қатъии Кодекси одоби хизматчии давлатӣ ва татбиқи усулҳои муассири назорати дохилӣ чораҷӯӣ намоянд.