Маҳкам Маҳмудзода: «Фароҳам овардани фазои ҳуқуқӣ дар ҷомеа вазифаи аввалиндараҷаи давлати ҳуқуқбунёд мебошад»

ДУШАНБЕ, 28.12.2017 /АМИТ «Ховар»/. Дар Суди конститутсионии Ҷумҳурии Тоҷикистон бо иштироки раис, судяҳо ва кормандони Суди конститутсионӣ дар мавзӯи «Паёми Пешвои миллат ва таҳкими арзишҳои демократӣ» ҳамоиш доир гардид.

Маҳкам Маҳмудзода, раиси Суди конститутсионии Ҷумҳурии Тоҷикистон дар ҳамоиш иброз дошт, ки Паёми имсолаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Парлумон ҳамчун барномаи мукаммали сиёсиву ҳуқуқӣ рушди соҳаҳои мухталифи ҳаёти ҷомеаи навини моро дар як давраи муайян мавриди таҳлилу натиҷагирӣ қарор дода, бобати ноил шудан ба дастовардҳои боз ҳам назаррас дар соҳаҳои иқтисодиву иҷтимоӣ ва фарҳангӣ, инчунин таҳкими суботу оромии ҷомеа, таъмини волоияти қонун, тартиботи ҳуқуқӣ дар назди мақомоти давлатӣ ва ҷомеаи Тоҷикистон вазифаҳои мушаххас гузошт.

Роҳбари давлат дар Паёми хеш ғояҳои асосии бунёди ҷомеаи ҳуқуқбунёдро ташкил кардани таъмини волоияти қонун ва ҳифзи ҳуқуқу озодиҳои инсон ва шаҳрванд маънидод намуда, зикр карданд, ки муносибатҳои ҷамъиятӣ дар ҳамаи соҳаҳо бояд тавассути қонунҳое танзим шаванд, ки ҷавобгӯйи меъёрҳои ахлоқ ва адолату инсондӯстӣ бошанд.

Пешвои миллат ҳамчунин фароҳам овардани фазои ҳуқуқиро дар ҷомеа вазифаи аввалиндараҷаи давлати ҳуқуқбунёд дониста, зикр карданд, ки барои амалӣ намудани ин ҳадаф, пеш аз ҳама, ҳифзи амният ва тартиботи ҳуқуқӣ зарур аст, зеро амният ва субот заминаи асосии рушди давлат ба ҳисоб мераванд.

Маҳкам Маҳмудзода зикр кард, ки дар асоси амалишавии ҳадафҳои дар Паём гузошташуда ҳамасола дар ҳаёти ҷомеа дигаргуниҳои куллӣ рӯи кор меоянд, низоми ҳуқуқии кишвар таҳким меёбад, соҳаи иқтисодиву иҷтимоӣ рушд мекунад ва дар ҳамин замина сатҳу сифати зиндагии мардум боло мегардад, ҷойҳои нави корӣ таъсис дода шуда, мардум ба шуғли доимӣ фаро гирифта мешавад ва дар маҷмӯъ, ҳадафҳои конститутсионии давлат роҳандозӣ карда мешаванд.

Бинобар ин, ҳар як шаҳрванди кишвар бо меҳнати софдилонаи худ бояд кӯшиш намояд, ки дар амалишавии вазифаҳои дар Паёми Пешвои миллат гузошташуда саҳми созгор дошта бошад, сулҳу оромӣ, суботи сиёсӣ ва ваҳдату якпорчагии давлатро эмин нигоҳ дорад.

Даврон Ҳошимзода, судяи Суди конститутсионӣ оид ба паҳлуҳои мухталифи Паёми Пешвои миллат зикр кард, ки бинобар татбиқи бомароми вазифаҳои дар Паём зикршуда, ҷомеаи Тоҷикистон сарбаландона ба марҳилаи сифатан нави рушд ворид гардида, ба ҳар як сокини кишвар шароити арзандаи зиндагӣ таъмин мегардад ва кафолати инкишофи озодонаи шахс таъмин мешавад.

Роҳбари давлат дар Паём пешравиҳои бадастомадаро натиҷаи саъю кӯшиши ҳар як сокини мамлакат дониста, зикр намуданд, ки ин омил бори дигар аз иродаи қавӣ, заҳматпешагӣ ва ҳисси баланди ватандӯстона доштани кулли шаҳрвандони Тоҷикистони муқаддасу маҳбубамон дарак медиҳад. «Минбаъд низ хурду бузурги мамлакат бояд дар навбати аввал ба хотири ҳифзи сулҳу оромӣ, суботи сиёсӣ ва ваҳдати миллӣ дар кишвари азизамон саъю кӯшиши худро сафарбар созанд, зеро мардуми шарифи Тоҷикистон ҳуқуқи маънавии зиндагии шоистаро доранд»,- зикр карданд Пешвои миллат.