Манзараҳои зебои ноҳияи Сангвор сайёҳони дохилӣ ва хориҷиро ба худ ҷалб менамоянд

САНГВОР, 26.12.2017 /АМИТ «Ховар»/.  Сокинони ноҳияи Сангвор Паёми навбатии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро ба Маҷлиси Олии Ҷумҳурии Тоҷикистон дастаҷамъона тамошо намуда, аз Соли рушди сайёҳӣ ва ҳунарҳои мардумӣ эълон гардидани соли 2018 изҳори хушнудӣ карданд. Зеро манзараҳои дилнишини ноҳияи Сангвор сайёҳони дохилӣ ва хориҷиро ба худ ҷалб намуда, дар сурати рушд ёфтани ин соҳа барои сокинони ин ноҳия ҷойҳои нави корӣ таъсис мегарданд ва тиҷорати соҳибкорону бонувони ривоҷдиҳандаи ҳунарҳои мардумӣ равнақ меёбад.

Мудири шуъбаи рушди иҷтимоӣ ва робита бо ҷомеаи ноҳияи Сангвор Шодӣ Раҳмонов гуфт, ки Президенти Ҷумҳурии Тоҷикистон муҳтарам Эмомалӣ Раҳмон зимни ирсоли Паёми навбатии худ ба Маҷлиси Олии Ҷумҳурии Тоҷикистон вазъи кунунии ҷомеаи Тоҷикистон ва тамоми паҳлуҳои ҳаёти сиёсӣ, иҷтимоӣ ва иқтисодии мамлакатро мавриди таҳлилу баррасӣ қарор доданд. Паёми имсолаи Президент дар бораи самтҳои асосии сиёсати дохилӣ ва хориҷии мамлакат баъди ҷашни чорякасраи истиқлолияти давлатии Тоҷикистон, яъне дар даврае пешниҳод мегардад, ки кишвари мо ба марҳалаи нави рушд ворид гардида, мардуми шарифи Тоҷикистон ба сӯи ояндаи ободу осуда бо қадамҳои устувор пеш меравад.
Умумияти ҳадафу вазифаҳое, ки дар назди давлатҳо қарор доранд, зарурати дар минтақа муҳайё намудани фазои мусоиди рафтуомади озоди одамон, интиқоли бемамониати молу сармоя ва захираҳои меҳнатиро тақозо менамояд.