ТАҚВИМИ АМИТ «ХОВАР»: Имрӯз 28 декабр, панҷшанбе, 362-юмин рӯзи соли 2017 аст. То соли нав 3 рӯзи дигар боқӣ мондааст
![](https://khovar.tj/wp-content/uploads/2017/09/SHukuh22-e1504669211289.jpg)
Тақвими моро дар ин гӯша
шореҳ Шукӯҳи ДАЛЕР варақ мезанад:
28 декабри соли 2013 Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон қонунҳои Ҷумҳурии Тоҷикистон «Дар бораи таълиму тарбияи томактабӣ» ва «Дар бораи мубориза бар зидди ҷиноятҳои муташаккил»- ро имзо карданд.
***
2 сол пеш, 28 декабри соли 2015 дар маҷлиси навбатии Ҳукумати Ҷумҳурии Тоҷикистон Барномаи давлатии сармоягузориҳо барои солҳои 2016-2020 тасдиқ карда шуд.
***
Дар ин рӯзи соли 2016 дар Маҷмааи кӯҳию лижаронии «Сафеддара» Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо намояндагони ҷавонон ва варзишгарони мамлакат мулоқоти судманду самимӣ доир карданд.
28 ДЕКАБР ТАҶЛИЛ КАРДА МЕШАВАД:
Рӯзи байналмилалии кино.
***
Дар Ҷумҳурии Тоҷикистон – Рӯзи кормандони мақомоти амнияти миллӣ.
***
Дар Испания –Рӯзи ханда.
РӮЙДОДҲО:
28 декабри соли 2010 дар Академияи илмҳои Тоҷикистон дар мавзӯи «Ибни Сино ва мушкилоти муосири фалсафа ва тиб» конфронси илмӣ – назариявӣ баргузор гардид. Конфронси мазкур ба муносибати 1030-солагии зодрӯзи олим ва файласуфи барҷастаи тоҷик, нобиғаи асримиёнагӣ Абӯалӣ ибни Сино баргузор карда шуд.
***
181 сол муқаддам, 28 декабри соли 1836 Испания истиқлолияти Мексикаро эътироф кард.
***
Дар ин рӯзи соли 1999 дар кароргоҳи СММ дар Ню-Йорк намояндагони Португалия ва Индонезия ҳуҷҷат оид ба барқарор намудани муносиботи дипломатиро ба имзо расониданд.
***
28 декабри соли 2007 Непал Ҷумҳурии Федеративӣ-Демократӣ эълон карда шуд.
ИНЧУНИН ДАР ИН РӮЗ …
Соли 1895 дар Париж аввалин киносеанси оммавии пулакӣ баргузор гардид.
***
Соли 1908 дар ҷазираи Ситсилия (Италия) заминҷунбии шадид ба амал омад, ки дар натиҷа 75 ҳазор нафар ба ҳалокат расиданд.