Тоҷикистон дар Фестивали фарҳанг ва санъати кишварҳои Осиёи Марказӣ дар Сеул иштирок намуд

ДУШАНБЕ, 18.12.2017. /АМИТ «Ховар»/. Аз 12 то 17 декабри соли равон дар шаҳри Сеули Ҷумҳурии Корея Фестивали фарҳанг ва санъати кишварҳои Осиёи Марказӣ баргузор гардид.

Ба иттилои маркази матбуоти Вазорати фарҳанги Ҷумҳурии Тоҷикистон, дар фестивали мазкур намояндагони кишварҳои Осиёи Марказӣ, аз ҷумла, Тоҷикистон иштирок намуданд.

Фарҳанг ва санъати Тоҷикистонро дар фестивал гурӯҳи ҳунарпешаҳо, ки аз намояндагони Ансамбли давлатии хизматнишондодаи рақсии «Лола» ба номи Ғ. Валаматзода, ансамбли давлатии «Шашмақом» ва ансамбли эстрадии «Гулшан» иборат буданд, муаррифӣ намуд.

Ҳайати Тоҷикистон ба тамошобинони фестивал намунаҳои беҳтарини рақс ва оҳангу сурудҳои классикиву муосири тоҷикро пешниҳод намуданд, ки аз ҷониби онҳо бо шавқи беандоза пазироӣ гардиданд.