Ба сокинони ноҳияи Шаҳритус Паёми Пешвои миллат шарҳ дода шуд

ШАҲРИТУС, 10.01.2018 /АМИТ «Ховар»/. Имрӯзҳо мулоқоти гурӯҳҳои корӣ дар иртибот ба ташреҳи Паёми солонаи Пешвои миллат муҳтарам Эмомалӣ Раҳмон дар шаҳру навоҳии мамлакат идома дорад. Гурӯҳи корӣ аз ҳисоби кормандони муассисаву созмонҳои давлатӣ ва донишмандони саршиноси ҷумҳурӣ  дар ноҳияи Шаҳритуси вилояти Хатлон суҳбату вохӯриҳои худро идома медиҳад. То ин дам дар ҷамоатҳои Талбак Садриддинов, Обшорон, Х. Холматов, Ҷура Назаров бо аҳли ҷамоат ва фаъолони ноҳия мулоқотҳои судманд доир гардиданд. Донишмандони маъруфи тоҷик А. Мирзозода, С. Муллоҷон, А. Муродзода, Т. Ғуломов ва Ф. Одинаев бандҳои асосии Паёмро ба сокинони ин ҷамоатҳо шарҳу тавзеҳ  доданд. Аз ҷумла, масъалаи таъмини амнияти давлат ва мардум, ки шарти асосии пешрафти ҳар мамлакат дониста мешавад ва хатари гаравидани ҷавонон ба ҳизбу ҳаракатҳои террористӣ махсус таъкид карда шуд.

Зикр шуд, ки соли равон бо ташаббуси Пешвои миллат Соли рушди сайёҳӣ ва ҳунарҳои мардумӣ эълон гардид. Ба мардуми ноҳия гуфта шуд, ки бояд иншооти таърихиву меъмории ноҳияро бештар тарғиб кунанд. Гурӯҳи корӣ аз ёдгориҳои таърихӣ-меъмории ноҳия ва минтақа, аз ҷумла, Хоҷа Машҳад, Хоҷа Дурбат, Тахти Сангин ва Чилучорчашма дидан карда, доир ба аҳамияти ин ёдгориҳо бо мардум гуфтугӯ карданд.

Дар мулоқот таъкид шуд, ки ба масъалаҳои мактабу маориф ва тарбияи насли ҷавон дар самти худшиносии миллӣ бояд бештар таваҷҷуҳ зоҳир карда шавад.