«Барги андеша»-дарси хотирмоне барои наврасону ҷавонон

ДУШАНБЕ, 09.01.2018. /АМИТ «Ховар»/. Нашриёти «Истеъдод» китоби нави рӯзноманигори маъруф ва қаламкаши ҷӯянда Ҳотами Ҳомидро таҳти унвони «Барги андеша» ба нашр расонид. Ин маҷмӯаи чоруми Ҳотами Ҳомид мебошад.

Дар китоб роҷеъ ба фаъолияти эҷодии адибону санъаткорони маъруф, ки дар рушди адабу санъати тоҷик саҳми арзанда гузоштаанд, дар жанри гузоришу мусоҳиба маводи хеле ҷолиби диққат пешкаши хонанда гардидааст.

Мутолиаи китоб ҳамзамон барои он муфид аст, ки коргоҳи эҷодии эҷодкоронро бозгӯӣ намуда, барои наврасону ҷавонон дарси хотирмон мегардад. Мусоҳибаҳои Ҳотами Ҳомид бо адибони маъруф Кароматуллоҳи Мирзо, Сайидалӣ Маъмур, Саттор Турсун, Муҳиддин Хоҷазод, санъаткорон Ҷӯрабек Муродов, Убайдулло Раҷабов, шодравон Зафар Нозимов ва дигарон шавқовару хеле хонданбобанд.