Барои рушди соҳаи моҳипарварӣ ба «Баҳри тоҷик» зиёда аз 1 млн дона моҳичаҳо сар дода шуданд

ХУҶАНД, 09.01.2018. /АМИТ «Ховар»/. Дар давоми соли 2017 дар хоҷагиҳои моҳипарварии вилояти Суғд сайди моҳӣ 285,2 тоннаро ташкил намуд, ки он ба 6103,3 ҳазор сомонӣ баробар аст. Яъне, истеҳсоли моҳӣ нисбат ба соли 2016 0,8 фоиз афзудааст.

Ба иттилои масъулини Сарраёсати идораи кишоварзии вилоят, дар ин давра хосатан истеҳсоли моҳиҳои намуди пешонағафси сафед 9,1 фоиз, намуди зағорамоҳӣ 13,7 фоиз, намуди амури сафед 16,9 фоиз, намуди суфмоҳӣ 8,3 фоиз ва дигар намудҳо 52,0 фоизро ташкил дод.

Яке аз хоҷагиҳое, ки дар самти афзоиши моҳӣ ва рушди ин соҳа саҳми назаррас дорад, Ҷамъияти саҳомии кушодаи «Моҳипарвари Гулистон»-и Агентии таъминоти амволи махсуси назди Ҳукумати Ҷумҳурии Тоҷикистон ба ҳисоб меравад.

Ба иттилои хабарнигори минтақавии АМИТ «Ховар», ҶСК «Моҳипарвари Гулистон» чун ҶСК «Моҳии тоҷик»-и ноҳияи Б.Ғафуров ва ҶСК «Моҳипарварӣ»-и шаҳри Панҷакент аз муассисаҳои калонтарини моҳипарварӣ дар миқёси мамлакат ба ҳисоб меравад. Он тибқи нақша дар асоси шартномаи ҳамкорӣ бо ҶС «Моҳии тоҷик» , ки яке аз хоҷагиҳои калонтарини моҳипарварии ҷумҳурист, дар тобеияти Вазорати кишоварзӣ қарор дошта, чун хоҷагии зотпарварӣ-моҳипарварӣ дар он номгӯи зиёди моҳиҳо парвариш мешаванд.

Танҳо давоми соли 2017 дар асоси иҷрои дастуру супоришҳои Ҳукумати мамлакат дар самти афзун намудани захира ва навъҳои гуногуни моҳӣ, дар доираи маъракаи такрористеҳсолкунии захираҳои моҳӣ дар ду марҳила аз ҳавзҳои ҶС «Моҳии тоҷик» ба обанбори «Баҳри тоҷик», ки ҳоло дар он моҳиҳои пешонағафси сафед, зағорамоҳӣ, суфмоҳӣ, амури сафед ва сиёҳ, пешонағафси аъло, гулмоҳӣ, зармоҳӣ ва мормоҳӣ парвариш меёбанд, зиёда аз 1 млн дона моҳичаҳо, аз қабили навъҳои капур, амури сафед ва пешонапаҳн сар дода шуданд.

Ба андешаи мутахассисони соҳа, дар ҷумҳурӣ соҳаи мазкур дар даврони соҳибистиқлолӣ рӯ ба рушд ниҳода, дар ин замина солона имкони истеҳсоли то 5 ҳазор тонна гӯшти моҳӣ мавҷуд мебошад. Ин нишондиҳанда метавонад барои таъмини амнияти озуқаворӣ, хосатан ин намуди гӯшти парҳезӣ мусоидат намояд.