Дар маркази ноҳияи Варзоб мағозаи фурӯши маҳсулоти ҳунарҳои мардумӣ ташкил карда мешавад

ВАРЗОБ, 06.01.2018 /АМИТ «Ховар»/. Дар ноҳияи Варзоб ба рушди ҳунарҳои мардумӣ диққати ҷиддӣ дода мешавад.  Барои ин курсҳои махсуси омӯзишӣ ташкил карда шудааст ва нақша дорем, ки имсол дар маркази ноҳияи Варзоб мағозаи фурӯши маҳсулоти ҳунарҳои мардумӣ низ ташкил намоем. Ин матлабро раиси ноҳияи Варзоб  Савзаалӣ Назирзода зимни нишасти хабарӣ, ки дирӯз доир гардид, иброз дошт.

Тавре раиси ноҳия иброз дошт, Варзоб бо доштани беш аз 957 адад минтақаҳои истироҳатии замонавӣ, табиати зебои афсонавӣ ва маскани осоиши рӯҳу тан буданаш ҷойи дӯстдоштаи сайёҳони дохилию хориҷӣ қарор дорад.

Ба маълумоти номбурда, ҳамасола шинондани беш аз 46 ҳазор бех гулҳои мавсимию ҳамешасабз ба ҳусни ин дараи зебоманзар ҳусни тоза зам менамояд. «Дар соли гузашта беш аз 59 ҳазору 754 бех дарахтони гуногун шинонда шуд, ки аз ин миқдор беш аз 23 ҳазораш дарахтони мевадиҳанда мебошад»,- гуфт Савзаалӣ Назирзода.