Дурустии пешгӯии обуҳавосанҷон ба 90% баробар шудааст

ДУШАНБЕ, 25.01.2018 /АМИТ «Ховар»/. Соли 2017 аз ҷониби Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон 365 пешгӯии шабонарӯзӣ тартиб дода шуд, ки дурустии онҳо ба 90% баробар аст. Ин хабарро имрӯз зимни нишасти матбуотӣ раиси Кумитаи ҳифзи муҳити зисти ҷумҳурӣ Хайрулло Ибодзода ба хабарнигорон расонид.

Ба гуфтаи Хайрулло Ибодзода, соли сипаригардида дурустии пешгӯиҳои Агентии обуҳавошиносии Кумита ба 90 фоиз баробар гашт, ки нисбат ба соли қаблӣ 3 фоиз баланд аст.

Ҳамчунин зикр карда шуд, ки дар ин муддат дар шаҳру ноҳияҳои тобеи марказ ва вилояти Хатлон дар доираи лоиҳаи «Мукаммалсозии хизматрасонии обуҳавошиносӣ дар Осиёи Миёна», ҷузъи «С», 54 адад стансияҳои обуҳавосанҷӣ ва 16 адад дидбонгоҳҳои обченкунӣ ба таври замонавӣ муҷаҳҳаз гардонида шуда, 25 стансияи обуҳавосанҷӣ бо хона-вагонҳо таъмин карда шуданд.