Шахсияти 4 нафар кӯдакони тоҷики дар Ироқбуда муайян шуд

ДУШАНБЕ, 13.01.2018 /АМИТ «Ховар»/. Вазорати корҳои дохилии Ҷумҳурии Тоҷикистон шахсияти 4 нафар кӯдакони тоҷикеро, ки дар паноҳгоҳе дар Ироқ нигаҳдорӣ карда мешуданд, муайян карда, тамоми кӯшишро ба харҷ дода истодааст, то онҳоро ба Тоҷикистон баргардонад. Дар ин бора сухангӯи Вазорати корҳои дохилии Ҷумҳурии Тоҷикистон Умарҷони Эмомалӣ ба мухбири АМИТ «Ховар» хабар дод.

Ба гуфтаи Умарҷони Эмомалӣ, Оишаи 16-сола, Абдуллои 9-сола, Фотимаи 7-сола ва Муҳаммади сесола фарзандони Илҳомиддин Аслонов, сокини шаҳри Душанбе ҳастанд, ки се сол пеш ҳамроҳ бо ҳамсараш аз Москва ба Ироқ рафта будаанд. Ҳоло пайвандони ин кӯдаконро пайдо кардаанд ва талош доранд онҳоро ба ватан баргардонанд. «Вазорати корҳои дохилии Тоҷикистон талош дорад дар ҳамкорӣ бо Вазорати корҳои хориҷӣ ин кӯдаконро ба ватан баргардонад. Аллакай санадҳои зарурии онҳо омода шуда, ба намояндагии давлати Ироқ дар Қазоқистон фиристода шудаанд», — зикр намуд ӯ.

Ба гуфтаи пайвандони кӯдакони ёфтшуда, Илҳомиддин Аслонов  бо мақсади кор кардан соли 2006 ҳамроҳ бо ҳамсар ва ду фарзандаш — Оиша ва Исломҷон ба Москва рафтааст ва баъдан соли 2007 онҳо бо мақсади зиндагӣ ва кор ба давлати Миср рафта, дигар фарзандонашон, аз ҷумла, Фотима, Абдулло ва Муҳаммад дар онҷо ба дунё омадаанд. То  соли 2016 Илҳомиддин Аслонов бо пайвандонаш телефонӣ дар тамос буд ва хоҳараш Гулбаҳор Асланова суратҳои фарзандони бародарашро тавассути Интернет  дида будааст. Дар айни ҳол Гулбаҳор Асланова  аз  Вазорати корҳои дохилии Ҷумҳурии Тоҷикистон дархост дорад, то барои баргардонидани ҷиянҳои  ноболиғаш  кумак  намоянд.

Ёдовар бояд шуд, ки симои ин кӯдакон 26 сентябри соли сипаригашта дар шабакаҳои хабарии хориҷӣ намоиш дода шуда буд, аммо сарнавишти волидони онҳо маълум нест.