Аъзои Маҷлиси миллӣ се қонуни конститутсиониро ҷонибдорӣ намуданд

ДУШАНБЕ, 17.02.2018 /АМИТ «Ховар»/. Наздик ба бист масъалаи ҳаётан муҳим  дар иҷлосияи чордаҳуми Маҷлиси миллии Маҷлиси Олии Ҷумҳурии Тоҷикистон, ки нимаи дуюми рӯзи 16 феврал дар Душанбе доир шуд, аз ҷониби аъзои палатаи болоии Парлумони Тоҷикистон баррасӣ ва ҷонибдорӣ гардиданд.

Хабарнигори АМИТ «Ховар» иттилоъ медиҳад, ки аъзои Маҷлиси миллӣ  се қонуни конститутсионӣ, аз ҷумла Қонунҳои Ҷумҳурии Тоҷикистон «Оид ба ворид намудани  тағйиру иловаҳо  ба Қонуни конститутсионии Ҷумҳурии Тоҷикистон  «Дар бораи судҳои Ҷумҳурии Тоҷикистон», «Дар бораи интихоботи Президенти Ҷумҳурии Тоҷикистон» ва «Дар бораи интихоботи Маҷлиси Олии Ҷумҳурии Тоҷикистон»-ро  баррасӣ намуданд. Масъалаҳои иҷлосияро раисони Кумитаҳои Маҷлиси миллии Маҷлиси  Олии  Ҷумҳурии Тоҷикистон Озода Раҳмон, Маҳмадюсуф Имомзода, Давлатшо Гулмаҳмадзода, Раҳмоналӣ Амирзода шарҳу тавзеҳ доданд. Таъкид шуд, ки ҳадаф аз ворид намудани тағйиру иловаҳо ба қонунҳои конститутсионии Ҷумҳурии Тоҷикистон  такмили қонунгузории кишвар, мутобиқ намудан ба Конститутсияи Ҷумҳурии Тоҷикистон, таҳкими адолати судӣ, ҳимояи ҳуқуқи интихобкунандагон,  таъмини амнияти фазои интихоботии кишвар ва баргузор намудани интихоботи шаффофу демократӣ мебошад.

Дар иҷлосияи чордаҳуми Маҷлиси миллӣ ҳамзамон Қонуни Ҷумҳурии Тоҷикистон «Дар бораи ғалла ва маҳсулоти коркарди он», «Дар бораи мораторий  ба санҷишҳои  фаъолияти субъектҳои соҳибкорӣ  дар соҳаи истеҳсолӣ», «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи зотпарварӣ» баррасӣ ва ҷонибдорӣ гардиданд.

Дар иҷлосияи чордаҳуми Маҷлиси миллӣ ҳамзамон Қонуни Ҷумҳурии Тоҷикистон «Дар бораи ғалла ва маҳсулоти коркарди он», «Дар бораи мораторий  ба санҷишҳои  фаъолияти субъектҳои соҳибкорӣ  дар соҳаи истеҳсолӣ», «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи зотпарварӣ» баррасӣ ва ҷонибдорӣ гардиданд.

Қонуни Ҷумҳурии Тоҷикистон «Дар бораи ғалла ва маҳсулоти коркарди он» кишт, истеҳсол,  воридот, содироти ғалла ва маҳсулоти ғалла, ваколатҳои  мақомоти маҳаллиро дар соҳаи  ғалла,  экспертиза ва сифати ғалла, назорати давлатӣ ва дигар масъалаҳои марбут ба ғалла ва маҳсулоти коркарди онро дар Ҷумҳурии Тоҷикистон ба танзим медарорад. Бо қабули Қонуни  Ҷумҳурии Тоҷикистон «Дар бораи ғалла ва  маҳсулоти коркарди он» Қонуни Ҷумҳурии Тоҷикистон «Дар бораи ғалла» аз эътибор соқит дониста мешавад.

Қонуни Ҷумҳурии Тоҷикистон «Дар бораи мораторий  ба санҷишҳои  фаъолияти субъектҳои соҳибкорӣ  дар соҳаи истеҳсолӣ», бо мақсади дастгирии давлатии соҳибкории истеҳсолӣ, таъмини барномаҳои қабулшудаи давлатӣ дар самти истеҳсоли маҳсулоти ивазкунандаи воридот, ташкили ҷойҳои кории нав, таҳкими иқтидори саноатию содиротии ҷумҳурӣ, бартараф намудани санҷишҳои беасосу такрорӣ ва фароҳам овардани фазои мусоид барои соҳибкориву сармоягузорӣ таҳия гардидааст.  Дар иҷлосия ҳамзамон  ба Кодексҳои андозу гумрук  тағйиру иловаҳо ворид гардиданд. Инчунин тибқи тағйиру иловаҳо ба Кодексҳои андозу гумрук барои истеҳсоли либоси шакли ягонаи мактабӣ ва томактабӣ, воридоти автомашинаҳои нав, таҷҳизоти истеҳсолию технологӣ, таҷҳизоти ҳозиразамони ташхису табобат, инчунин вородоти технологияву таҷҳизот ва маводи истеҳсолот барои таъминоти соҳаи паррандапарварӣ, воридоти ҳавопаймоҳо, локомотивҳо ва вагонҳои замонавии мусофиркашонӣ имтиёзҳо дода мешаванд.

Дар иҷлосияи чордаҳуми Маҷлиси миллӣ ҳамзамон нақшаи чорабиниҳои Маҷлиси  миллии Маҷлиси Олии Ҷумҳурии Тоҷикистон «Оид ба Паёми  Президенти Ҷумҳурии Тоҷикистон  ба Маҷлиси Олии Ҷумҳурии Тоҷикистон «Дар бораи самтҳои сиёсати  дохилӣ ва хориҷии Ҷумҳурии Тоҷикистон»  аз 22 декабри соли 2017» тасдиқ  карда шуд. Ҳамзамон аъзои палатаи болоии Парлумони мамлакат  пешниҳоди Ҳукумати Ҷумҳурии Тоҷикистонро дар бораи  иваз намудани номи шаҳрҳои Қӯрғонтеппа ба Бохтар, Сарбанд ба Леваканд ва ноҳияи Бохтар ба Кӯшониён, инчунин пешниҳоди Президенти Ҷумҳурии Тоҷикистон дар бораи бозхонд ва интихоби судяҳои Суди конститутсионӣ, Олӣ ва Олии иқтисодиро  тасдиқ намуданд. Дар иҷлосия дар назди аъзои Маҷлиси миллӣ Прокурори генералии Ҷумҳурии Тоҷикистон Юсуф Раҳмон «Дар бораи  назорати риояи дақиқ ва иҷрои якхелаи  қонунҳо дар ҳудуди Ҷумҳурии Тоҷикистон дар соли 2017» ҳисобот дод.