«ЧОЙХОНАИ ЛАБИ ҶАР». Темур Зулфиқоров дар Душанбе китоби нави худро муаррифӣ мекунад

ДУШАНБЕ, 23.02.2018. /АМИТ «Ховар»/. Пагоҳ, 24 феврал, соати 16:00 дар Театри давлатии академии драмавии ба номи Абулқосим Лоҳутӣ шаби эҷодии Т. Зулфиқоров ва маросими муаррифии китоби нави ӯ «Чойхонаи лаби ҷар» барпо мегардад.

«Чойхонаи лаби ҷар»  аз қиссаву ривояту андарзҳо ва афсонаҳо барои калонсолон, ки жанрҳои писандидаи муаллифанд, иборат аст. Осори Темур Зулфиқоров, ки чанде пеш бо Мукофоти адабии умумироссиягии ба номи И. Бунин сарфароз гардида буд, бо сабку услуби хос ва  шабеҳи насри мусаҷҷаъ (қофиядор)  фарқ мекунад.

Тарҷумаи китоби тозанашр ба қалами адиби шодравон Муҳаммадзамон Солеҳ, нависандагон Юнус Юсуфӣ, Ҳикмат Неъмат ва нависандаю драманависи шинохта Нур Табар мансуб аст. Зимнан, се сол муқаддам китоби дигари Темур Зулфиқоров «Афъимори марҷонӣ» — ро ҳам Нур Табар ба тоҷикӣ гардонда буд.

Ба китоби нави Темур Зулфиқоров  шоира Гулрухсор пешгуфтор навиштааст.

Темур Зулфиқоров 17 августи соли 1936 дар шаҳри Душанбе таваллуд ёфта, баъдан дар Донишкадаи адабии ба номи М. Горкий дар шаҳри Москва таҳсил намудааст. Модараш- профессор Людмила Владимировна Успенская, забоншинос ва педагоги маъруф, муаллифи китобҳои дарсӣ аз фанни забони русӣ барои синфҳои тоҷикӣ, падараш- рӯзноманигор ва хизматчии давлатӣ Қосим Зулфиқоров  мебошад, ки соли 1937 бар асари тӯҳмат ҳалок гардид.

Асарҳои Темур Зулфиқоров ба дувоздаҳ забони дунё тарҷума ва аз рӯи онҳо филмҳои зиёд ба навор гирифта шудаанд.

                                                                           Мансур СУРУШ,

шореҳи  адабии АМИТ «Ховар»