«Дар кӯчаҳои қисмат» занону бонувонро ҳушдор медиҳад, то ба доми фиреби нохалафон наафтанд

ДУШАНБЕ, 21.02.2018. /АМИТ «Ховар»/.  Дар Театри мусиқӣ- мазҳакавии ба номи Сайдалӣ Вализодаи шаҳри Кӯлоб нахустнамоиши спектакли  «Дар кӯчаҳои қисмат» аз рӯи пйесаи драманависи шинохтаи тоҷик Ато Ҳамдам баргузор гардид.

Асари мазкур аз лиҳози мӯҳтаво ва банду баст драмаи психологӣ буда, ба Соли рушди сайёҳӣ ва ҳунарҳои мардумӣ бахшида шудааст. Таҳиягари намоишнома Раҳмоналӣ Одинаев мебошад. Сужаи асар хеле ҷолиб аст. Духтари ҷавон Наргис бо сабаби содагию зудбовариаш ба доми андохтаи қаллобон афтида, ба Дубай бурда мешавад.

Дар он ҷо вай бо мушкилоти зиёд рӯ ба рӯ мегардад, аммо номус ва шаъну шарафи худро ҳифз мекунад. Дӯсти ӯ Шуҳрат, ки ҷавони хеле ҷасуру бонанг аст, аз ин қазия огоҳӣ ёфта, монеаҳои зиёдеро паси сар мекунад. Дар охир ӯ Наргисро пайдо намуда, ба бозгашти духтари фиребхӯрда кумак мерасонад.

Нақшҳои асосиро ҳунарпешагони театр Саида Султонова, Фаррух Содиқзода, Амиршо Баротов ва дигарон бозидаанд.