Дар маросими дафн дар ноҳияи Ванҷ бар асари муноқишаи оилавӣ ба се нафар зарари ҷисмонӣ расонида шуд

ДУШАНБЕ, 9.02.2018. /АМИТ «Ховар»/. Марди 41-солаи сокини деҳаи Ускероғи ноҳияи Ванҷ бо гумони қасдан расонидани зарари вазнин ба саломатӣ аз ҷониби кормандони милитсия дастгир карда шуд.

Тавре аз Маркази матбуоти Вазорати корҳои дохилии Ҷумҳурии Тоҷикистон ба АМИТ «Ховар» хабар доданд, номбурда ҳангоми маросими дафни бародараш, марди 63-солаи сокини ноҳияи Ванҷ, бинобар муноқишаи оилавӣ бо писарони амакаш, мардони 28 ва 25-сола ва апааш- зани 54-сола ҷанҷол карда, сипас бо корд ба бадани онҳо якчанд маротиба задааст.

Дар натиҷа онҳо ҷароҳатҳои вазнини ҷисмонӣ бардошта, дар беморхона бистарӣ шудаанд.

Аз рӯи ин ҳодиса парвандаи ҷиноятӣ оғоз гардида, тафтишот идома дорад.