Даври сеюми Олимпиадаи фаннии хонандагони шаҳри Душанбе ҷамъбаст гардид

ДУШАНБЕ, 17.02.2018 /АМИТ «Ховар»/. Дар Муассисаи давлатии «Душанбе-Плаза» ҷамъбасти даври сеюми Олимпиадаи фаннии хонандагони  шаҳри Душанбе доир гардид. Ҳадаф аз баргузории ҳамоиши мазкур  ҳавасманд намудан ва дастгирии муштараки Мақомоти иҷроияи ҳокимияти давлатии шаҳри Душанбе, Сарраёсати маорифи шаҳри Душанбе, Муассисаи давлатии Маркази рушди истеъдодҳо баҳри ташаккули минбаъдаи маҳорат ва малакаҳои хонандагони болаёқати пойтахт  ва омӯзгорони навовар мебошад.

Дар баробари сарфароз гардонидани хонандагони болаёқат бо медалу ифтихорномаҳо  ва туҳфаҳои хотиравӣ, инчунин  ҷоизаи «Беҳтарин дастаи хонандагони ноҳияҳои пойтахт» барои иштироки фаъол ва гирифтани миқдори зиёди ҷойҳои намоён, ҷоизаи «Беҳтарин дастаи муассисаи таълимии шаҳр Душанбе» барои ишғоли бештари ҷойҳои ифтихорӣ ва «Беҳтарин волидайн» барои тарбияи намунавии ду ё се фарзанд, ки дар Олимпиадаи мазкур иштирок ва сазовори ҷойҳои фахрӣ гаштанд, тақдим карда шуд.

Дар Олимпиадаи даври сеюми фаннии хонандагони шаҳри Душанбе 1414 нафар довталабон иштирок намуданд. Шумораи умумии ғолибон дар байни муассисаҳои таҳсилоти миёнаи умумӣ 200 нафар ва дар байни гимназияву литсейҳо 244 нафарро ташкил намуд. Аз ин миқдор дар байни хонандагони синфҳои 11-ум  148 нафар ғолиб гардида, барои иштирок дар олимпиадаи даври чоруми фаннӣ роҳхат гирифтанд.