Идигул Қосимзода: «75 нафар духтароне, ки аз падару модар маҳруманд, бо таълиму тарбия фаро гирифта шудаанд»

ДУШАНБЕ, 14.02.2018 /АМИТ «Ховар»/.  75 нафар духтароне, ки аз падару модар маҳрум ҳастанд, бо таълиму тарбия фаро гирифта шудаанд. Ин нуктаро имрӯз зимни нишасти матбуотӣ раиси Кумитаи кор бо занон ва оилаи назди Ҳукумати Ҷумҳурии Тоҷикистон Идигул Қосимзода зикр намуд.

«Дар назди Кумитаи кор бо занон ва оилаи назди Ҳукумати Ҷумҳурии Тоҷикистон Маркази «Чароғи ҳидоят»  фаъолият менамояд, ки ба духтарони ҷавоне, ки аз падару модар маҳрум ҳастанд, кумак расонида, онҳоро бо ҷои зист таъмин менамояд»,-  зикр намуд И.Қосимзода.

Ҳамчунин зикр карда шуд, ки  барои таълиму тарбия гирифтани ин духтарон Кумита корҳои назаррас анҷом дода истодааст.

Ҳамзамон бо мақсади фаъолгардонии нақши духтарон дар ҷомеа, омода  намудани духтарони сарвар, тарбияи кадрҳои болаёқат, муайян намудани истеъдодҳои ҷавон аз ҳисоби   донишҷӯдухтарон ва мусоидат намудан ба такомули шахсӣ ва боло бурдани  маърифати сиёсию ҳуқуқии онҳо  соли сеюм аст, ки дар заминаи Шӯрои донишҷӯдухтарони назди Кумита курси омӯзишии «Мактаби духтарони сарвар» фаъолият менамояд.

Соли 2017  50 нафар донишҷӯдухтарон  курси мазкурро хатм  намуда, соҳиби гувоҳномаи курси «Зан-роҳбар» гардида, ба рӯйхати захираи кадрии кумита ворид гардиданд.