МАЪРӮЗАИ РАМАЗОН РАҲИМЗОДА ДАР ҚАСРИ ХОФБУРГ. Ҷумҳурии Тоҷикистон аз ҷониби СММ ва САҲА шарики боэътимод дар минтақаи Осиёи Марказӣ арзёбӣ гардид

ДУШАНБЕ, 15.02.2018 /АМИТ «Ховар»/. Дар қароргоҳи Созмони Амният ва Ҳамкорӣ дар Аврупо (САҲА), ки дар Қасри бошукуҳи императории Хофбурги пойтахти Ҷумҳурии Австрия  шаҳри Вена воқеъ аст,  ҷаласаи навбатии Шӯрои амниятии  САҲА баргузор гардид.

Дар ҷаласаи мазкур Вазири корҳои дохилии Ҷумҳурии Тоҷикистон Рамазон Раҳимзода сухан гуфта, ҳозиринро бо ҷараёни ислоҳоти милитсия ва корҳои дар ин раванд анҷомдодаи Ҳукумати Ҷумҳурии Тоҷикистон ва Вазорати корҳои дохилӣ, инчунин густариши муносибатҳо бо САҲА шинос намуд.

Тавре аз Вазорати корҳои дохилӣ ба мухбири АМИТ «Ховар» хабар доданд, маърӯзаи Р. Раҳимзода аз ҷониби   давлатҳои  аъзои САҲА хуб пазируфта шуд. Намояндагони Словакия, Булғория, ИМА, Словения, Канада, Федератсияи Россия ва дигар кишварҳо назари худро вобаста ба маърӯзаи вазир мусбат арзёбӣ намуданд. Онҳо ташаббус ва кӯшишҳои Ҳукумати Тоҷикистонро ҷиҳати ислоҳоти милитсия дастгирӣ намуда,  ҷиҳати амалигардонии ислоҳоти мазкур изҳори қаноатмандӣ  карданд.

Зимни мулоқот масъалаҳои раванди ислоҳоти милитсия, пешгирии хатарҳои фаромиллӣ ва мубориза бар зидди ҷиноятҳои муташаккил баррасӣ гардиданд. Намояндагони СММ ва САҲА зикр карданд, ки Тоҷикистон дар минтақаи Осиёи Марказӣ ҳамчун шарики боэътимод арзёбӣ шуда,  онҳо омодаанд иқдомҳои Тоҷикистонро дастгирӣ намоянд, зеро, ба гуфтаи онҳо,  Тоҷикистон дар хати  аввали муқовимат бар зидди ҷиноятҳои фаромиллӣ, аз ҷумла терроризм ва маводи мухаддир  қарор дорад.