«МАВҚЕИ ОБ ДАР ТАБИАТ». Бахшида ба Даҳсолаи байналмилалии амал «Об барои рушди устувор» маҷмӯаи мақолаҳо ба нашр расид

ДУШАНБЕ, 20.02.2018 /АМИТ «Ховар»/. Бахшида ба Даҳсолаи байналмилалии амал «Об барои рушди устувор», солҳои 2018-2028 аз ҷониби нашриёти «Адиб» китоби доктори илми география, профессор Холназар Муҳаббатов бо унвони «Мавқеи об дар табиат» ба нашр расид. Тавре муаллиф ба мухбири АМИТ «Ховар» хабар дод, дар китоби тозанашр масъалаҳои марбут ба об мавриди пажӯҳишу таҳқиқ қарор гирифтаанд.

Профессор Холназар Муҳаббатов дар маҷмӯаи мақолаҳои илмии худ оид ба мавзӯъҳои «Об – асоси рушди устувор», «Захираҳои муҳими обҳои сайёра», «Ташаккулёбӣ ва ҳифзи манбаъҳои оби Тоҷикистон»  андешаҳояшро баён намуда, онҳоро ҳамаҷониба таҳқиқ намудааст.

Тавре муаллиф изҳор намуд, дар аввали солшумории мелодӣ аҳолии кураи замин ҳамагӣ 230 миллион нафарро ташкил менамуд. Ҳоло ин нишондиҳанда қариб ба 7 миллиард нафар расидааст. Азбаски манбаъҳои об дар қораю мамлакатҳо нобаробар тақсим шудаанд, ин ҳол сабаби ба вуҷуд омадани як қатор мушкилиҳо гардидааст. Ин, пеш аз ҳама, ба хусусиятҳои сатҳи замин ва омилҳои иқлимӣ сахт вобастагӣ дорад.

Ёдовар мешавем, ки Холназар Муҳаббатов айни ҳол устоди Донишгоҳи давлатии омӯзгории Тоҷикистон ба номи Садриддин Айнӣ буда, соли 1999 рисолаи доктории худро дар Институти географияи Федератсияи Россия дар мавзӯи «Проблемаҳои географию иқтисодии кӯҳистони Тоҷикистон» ҳимоя намудааст.