Шумораи донорҳои хунсупор дар шаҳру навоҳии вилояти Хатлон меафзояд

ДУШАНБЕ, 28.02.2018 /АМИТ «Ховар»/.   Давоми соли 2017 дар Муассисаи  давлатии «Маркази ҷумҳуриявии илмии хун»-и  шаҳри Бохтар   ва  намояндагиҳои муассисаи  мазкур  дар  шаҳру  навоҳии вилояти Хатлон  4 ҳазору  204 нафар донорҳои  хунсупор ва плазмасупор ба қайд гирифта шудаанд, ки ин шумора нисбат ба соли 2016 15% зиёд мебошад.

Тавре ба мухбири АМИТ «Ховар» аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар доданд,   танҳо таи як ҳафтаи охир дар  филиали Муассисаи давлатии «Маркази ҷумҳуриявии илмии хун» дар шаҳри Бохтари вилояти Хатлон 186 нафар донори хун ва плазмасупор ба қайд гирифта шудаанд.

Ба иттилои расида, аз донорони бақайдгирифташуда   ба миқдори зиёда аз  98 литр   маводи хун гирифта шуда, он барои кумаки фаврӣ ба беморони муассисаҳои тиббии шаҳру ноҳияҳои вилояти Хатлон дода мешавад.

Бояд гуфт, ки имрӯзҳо Муассисаи давлатии «Маркази ҷумҳуриявии илмии хун» бо ибтикори бевоситаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар доираи татбиқи  «Барномаи миллии рушди донории хун ва ҷузъҳои он дар Ҷумҳурии Тоҷикистон барои солҳои  ‎2015-2019»  дар ҷумҳурӣ тадбирҳои амалӣ меандешад.