«СОАТИ ПАРЛУМОНӢ»: сил бемории ҷаҳонист, аз ин рӯ чораҳои ҷавобии ҷаҳониро тақозо дорад

ДУШАНБЕ, 28.02.2018 /АМИТ «Ховар»/. Дар зарфи 15 соли охир –солҳои 2000-2015  дар ҷаҳон аз бемории сил 33 миллион нафар одамон фавтидаанд. Ин нуктаро  вакили Маҷлиси намояндагон Гулбаҳор Ашӯрова дар «Соати парлумонӣ», ки дирӯз дар мавзӯи  «Вазъи бемории сил дар  Ҷумҳурии Тоҷикистон» дар Душанбе доир гардид, баён  намуд. «Соати  парлумонӣ» бо ташаббуси кумита оид ба масъалаҳои  иҷтимоӣ, оила ва ҳифзи саломатии Маҷлиси намояндагон гузаронида шуда, таҳти раёсати муовини  Раиси Маҷлиси намояндагон Хайриниссо Юсуфӣ сурат гирифт.

Дар он зикр шуд, ки сил бемориест, ки инсон аз он тавассути  бактерия сироят меёбад. Он  ҳангоми сулфидан ё атса задани бемор тавассути сироятёбии ҳавоию қатравӣ паҳн мегардад. Гуфта шуд, ки сил бемории табобатшаванда буда, гирифтори он метавонад пурра шифо  ёбад. Сил бемории ҷаҳонӣ ба ҳисоб меравад, бинобар ин, чораҳои ҷавобии ҷаҳониро тақозо менамояд.

Соли равон сарони кишварҳои ҷаҳон дар маҷлиси якуми сатҳи олӣ оид ба бемории сил, ки таҳти сарпарастии Созмони Милали Муттаҳид  барпо мегардад, ҷамъ меоянд ва дар он масъалаҳоро оид  ба мубориза бар зидди бемории сил матраҳ хоҳанд кард.

Дар ҷаласаи «Соати парлумонӣ» ҳамзамон мутахассисони соҳа  доир ба роҳҳои мубориза бар зидди бемории сил дар ҷумҳурӣ табодули назар карданд.