Қурбон Ҳакимзода: «Кумитаи давлатии идораи замин ва геодезӣ беш аз 12 ҳазор ҳолати вайронкунии қонунгузории заминро ошкор намуд»

ДУШАНБЕ, 01.02.2018 /АМИТ «Ховар»/. «Агар ба таҳлилҳо нигоҳ кунем, тайи якчанд соли охир 42 нафар кормандони Кумита дар 42 ҳолат ба корупсия даст задаанд, ки қисмати зиёди онҳо аз кор ронда шуданд. Нисбат ба ин масъала дар Кумитаи давлатӣ Комиссияи алоҳида таъсис дода шудааст, ки тибқи он мубориза бо коррупсия  пурзӯр карда шудааст. Ин матлабро раиси Кумитаи  давлатии идораи замин ва геодезии Ҷумҳурии Тоҷикистон Қурбон Ҳакимзода имрӯз  зимни нашасти матбуотӣ иброз дошт.

Ба гуфтаи Қурбон Ҳакимзода, дар Кумитаи давлатии идораи замин ва геодезии Ҷумҳурии Тоҷикистон баҳри иҷрои Стратегияи муқовимат бо коррупсия ба таври доимӣ супоришҳои зарурӣ дода мешаванд.

Дар нишаст зикр карда шуд, ки Кумитаи давлатии идораи замин ва геодезӣ ва мақомоти он  дар маҳалҳо назоратро оид ба риояи қонунгузории замин ва самараноку оқилона истифода  бурдани майдонҳо соли гузашта боз ҳам пурзӯр намуда, 12 ҳазору 911 ҳолати вайронкунии қонунгузории заминро ошкор намуд. Инчунин зикр карда шуд, ки зимни  санҷишҳои назоратӣ 100 адад қарорҳои ғайриқонунӣ бекор карда шуданд.