АМИТ «Ховар» дар Остона бо Дипломи Озмуни минтақавии «Беҳтарин инъикоси масъалаҳои муҳоҷирати меҳнатӣ дар ВАО» сарфароз гардид

ДУШАНБЕ, 16.03.2018 /АМИТ «Ховар»/. Агентии миллии иттилоотии Тоҷикистон «Ховар»-и назди Ҳукумати Ҷумҳурии Тоҷикистон барои иштироки фаъол дар озмуни минтақавии «Беҳтарин инъикоси масъалаҳои муҳоҷирати меҳнатӣ дар ВАО» бо Диплом сарфароз гардонида шуд.

Озмуни мазкурро Клуби журналистони  Ассамблеяи мардуми Қазоқистон, Ташкилоти ҷамъиятии «Маркази байналмилалии «Жария» ва Филиали  Ҷамъияти Ҳилоли Аҳмар дар шаҳри Остона  эълон намуда буданд. Дар он расонаҳои иттилоотии кишварҳои минтақа, аз ҷумла, Қирғизистону Ӯзбекистон иштирок намуданд.

Дипломи озмуни минтақавии «Беҳтарин инъикоси масъалаҳои муҳоҷирати меҳнатӣ дар ВАО»-ро дирӯз, 15 марти соли 2018 дар шаҳри Остона  аз номи созмондиҳандагони  озмун ба директори АМИТ «Ховар»  намояндаи Сафорати Ҷумҳурии Тоҷикистон дар Ҷумҳурии Қазоқистон супорид.

Маврид ба зикр аст, ки АМИТ «Ховар» масоил ва рӯйдодҳои муҳими ҷумҳуриявӣ, минтақавӣ ва байналмилалӣ, бахусус дар самти муҳоҷирати меҳнатиро сари вақт ва бо маводу аксҳои ҷолиб пайваста инъикос менамояд. Бо Дипломи озмуни минтақавии «Беҳтарин инъикоси масъалаҳои муҳоҷирати меҳнатӣ дар ВАО» сарфароз шудани АМИТ «Ховар» бозгӯи ин гуфтаҳост.