Дар Брюссел имкониятҳои нави сармоягузорӣ ва сайёҳии Тоҷикистон муаррифӣ гардиданд

ДУШАНБЕ, 12.03.2018 /АМИТ «Ховар»/. 8 марти соли 2018 дар шаҳри Брюссел дар Пажӯҳишгоҳи аврупоии таҳқиқоти кишварҳои Осиё форуми сармоягузории кишвари мо зери унвони «Тоҷикистон: имкониятҳои нави сармоягузорӣ ва сайёҳӣ» баргузор гардид. Дар ин бора ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд.

Дар ин чорабинии муҳим  роҳбарони ниҳодҳои мухталифи Иттиҳоди Аврупо ва Шоҳигарии Белгия, Парлумони Аврупо, Бонки таҷдид ва рушди Аврупо, Бонки сармоягузории Аврупо, намояндагони ширкатҳои бузурги аврупоӣ дар бахшҳои гуногун ширкат намуданд.

Дар ҳамоиш Сафири Ҷумҳурии Тоҷикистон, Намояндаи доимии кишвари мо дар назди Иттиҳоди Аврупо Эркинхон Раҳматуллозода ширкаткунандагони нишастро ба ҳамкории созандаву мутақобилан судманд байни Тоҷикистону аъзои Иттиҳоди Аврупо даъват кард.

Муовини якуми Вазири рушди иқтисод ва савдои Ҷумҳурии Тоҷикистон Завқӣ Завқизода бо барномаи фарогири муаррифии имконоти сармоягузории кишвар суханронӣ намуда, муҳимтарин бахшҳои барои сармоягузорӣ ҷолиби Тоҷикистонро ба ҳозирин шинос кард.

Таваҷҷуҳи вижаи ҳозирин ба бахши сайёҳӣ ҷалб карда шуда, афзоиши теъдоди сайёҳон аз Аврупо ва бахусус кишварҳои Бенилюкс  дар солҳои охир ба Тоҷикистон таъкид гардид.

Зикр гардид, ки соли ҷорӣ, ки бо ташаббуси бевоситаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Соли рушди сайёҳӣ ва ҳунарҳои мардумӣ эълон шудааст, барои беҳтарин имкониятҳои ҳамкорӣ дар сармоягузорӣ ҷиҳати бунёди инфрасохтори ин соҳа шароити мусоид фароҳам меоварад.

Дар нишаст филми махсус доир ба сайёҳӣ ва имкониятҳои он дар Тоҷикистон ба намоиш гузошта шуд, ки барои ҳозирин хеле мароқовар буд.

Сипас Борис Ярошевич, роҳбари бахши Осиёи Марказии Хадамоти амалиёти хориҷии Аврупо, Шираз Каруи – Мушовири роҳбарияти Бонки сармоягузории Аврупо, Гуилим Ҷонс, роҳбари намояндагии Бонки рушду таҷдиди Аврупо дар Брюссел ва дигарон дар мавзӯи сармоягузорӣ дар Тоҷикистон суҳбат намуда, тағйироту таҳаввулоти дар фазои сармоягузории кишвар ба амал омада, имтиёзоти ба сармоягузорон ироашаванда ва зарурати ҳамкории босамар бо Тоҷикистонро таъкид намуданд.

Форуми сармоягузории Брюссел ҷиҳати тарғибу ташвиқи имкониятҳои сармоягузории кишвар ва алалхусус дар бахши сайёҳии он иқдоми ҷиддиву созандае гардид.