Дар шаҳри Кӯлоб хоҷагиҳои деҳқонӣ техникаи кишоварзиро баъди таъмир ба хатти тайёр гузоштанд

КӮЛОБ,  28.03. 2018  /АМИТ  «Ховар»/.  Гарму камбориш омадани фасли зимистон ва гармии аввалҳои фасли баҳор тараддуди  кишоварзонро барои оғози корҳои саҳроӣ зиёд намуд. Ба гуфти мутахассисони соҳаи кишоварзӣ, имсол баҳор 20 рӯз пеш омад ва вобаста ба ин мебояд кишти ҳама намуди маҳсулоти кишоварзиро барвақттар анҷом дод. Дар ҳамин замина дар Ҷамоати деҳоти «Зиракӣ»-и шаҳри Кӯлоб Кооперативи тиҷоратии ба номи Мир Саид Алии Ҳамадонӣ ва дигар хоҷагиҳои деҳқонӣ техникаи кишоварзиро баъди таъмир ба хатти тайёр гузоштанд. Мутахассисони раёсати кишоварзии вилояти Хатлон ва шаҳри Кӯлоб бори дигар омодагии техникаро аз назар гузарониданд.

Кооперативи тиҷоратии ба номи Мир Саид Алии Ҳамадонӣ яке аз хоҷагиҳои калонтарини вилояти Хатлон ба шумор рафта, дигар хоҷагиҳоро бо тухмии хушсифати пунба ва  ғалладонагӣ таъмин менамояд. Дар ин хатти тайёр асосан техникаҳои ин хоҷагӣ гузошта шуда буданд. Тавре  сармуҳандиси хоҷагӣ  Хайрулло Маҷидов иттилоъ  дод,  мутахассисон ба тайёрии техника ба мавсими кишти баҳорӣ баҳои баланд дода, ба баъзе механизаторон барои дуруст намудани нуқсу камбудиҳо дар мошинолот тавсияҳои судманд доданд. Ҳамин гуна омодагии техникӣ дар дигар ҷамоатҳои деҳоти шаҳри Кӯлоб низ гузаронида шуда, шумораи  умумии техникаи кишоварзии барои кишти баҳорӣ омодашуда муайян гардидааст.

Раёсати Кооперативи тиҷоратии ба номи Мир Саид Алии Ҳамадонӣ ба таъмиргарон ва механизаторон барои омода кардани техникаи кишоварзӣ ба мавсими кишт ифтихорнома ва туҳфаҳо тақдим кард. Гуфта шуд, ки бо мусоидати боду ҳаво кишти пунбадона ва дигар маҳсулоти кишоварзӣ дар муҳлати кӯтоҳтарин анҷом дода мешавад.