ЭҲЁИ ҲУНАРҲОИ МАРДУМӢ: дар Донишкадаи санъати тасвирӣ ва дизайни Тоҷикистон фестивали корҳои эҷодии устодон ва донишҷӯён баргузор гардид

ДУШАНБЕ, 31.03.2018. /АМИТ  «Ховар»/. Бахшида ба Соли рушди сайёҳӣ ва ҳунарҳои мардумӣ имрӯз дар Донишкадаи санъати тасвирӣ ва дизайни Тоҷикистон фестивали корҳои эҷодии устодон ва донишҷӯёни Донишкада доир гардид.  Дар инбора гузориши хабанигорони АМИТ «Ховар».

Тавре  мухбири АМИТ «Ховар» хабар медиҳад, дар чорабинии идона Вазири фарҳанги Ҷумҳурии Тоҷикистон Шамсиддин Орумбекзода иштирок намуда, ба маҳсули корҳои эҷодии ҳунармандон баҳои баланд дод.

Дар саҳни Донишкада аз ҷониби донишҷӯён навъҳои гуногуни хӯрокҳои миллӣ, нону кулчаҳои миллии мардумӣ, шириниҳои гуногун  пешниҳод гардид, ки ҳар кадом аз хони бою таърихи куҳан доштани мардуми тоҷик ҳикоят мекарданд. Ҳамчунин маҳсулоти кишоварзӣ ва дастранҷи деҳқонони мамлакат пешниҳоди бинандагон карда шуд, ки меҳмонони дохилу хориҷи кишвар аз он тамошои дастранҷи устодону донишчуён баҳравар гардиданд.

Аз ҷониби донишҷӯён барномаи консертӣ, қироати шеъру суруд манзури бинандагон карда шуд, ки аз маҳорати воло ва шавқӯ рағбати донишҷӯён ба санъату мусиқӣ ва арҷ гузоштан ба суннатҳои миллӣ далолат менамояд.

Дар ҷараёни баргузории чорабинии мазкур ректори донишкада Ҷамшед Ғанизода сухан гуфта, изҳор дошт, ки баргузории ин фестивал  баҳри эҳёи ҳунарҳои миллии халқи тоҷик ва баланд бардоштани ҳисси фарҳангдӯстиву ватандӯстӣ заминаи мусоид фароҳам меорад.

                                                                             Зарангези ЛАТИФ,
Тоҳир САИД,
АМИТ «Ховар»