ГУЛ МЕПАРВАРЕМ! Дар шаҳри Бохтар ба парвариши гулҳо диққати махсус дода мешавад

БОХТАР, 28.03.2018 /АМИТ «Ховар»/. Дар Корхонаи давлатии фаръии «Обтаъминкунӣ ва корез»-и шаҳри Бохтар оид ба парвариши гулҳои мавсимӣ ва самаранок истифода бурдани замин бо иштироки намояндагони Корхонаи воҳиди давлатии «Хоҷагии манзилию коммуналӣ»-и Ҷумҳурии Тоҷикистон, мутахассисон аз вилояти Суғд, роҳбарони Корхонаи воҳиди давлатии обтаъминкунӣ ва корези шаҳру навоҳии вилояти Хатлон ва намояндагони дигар ташкилоту муассиса, корхонаҳое, ки ба парвариш ва нигоҳубини гулҳои мавсимӣ машғуланд, семинари вилоятӣ баргузор гардид.

Дар семинар муовини раиси шаҳри Бохтар Дилшод Муҳаммадҷонзода оид ба ҳадафи аслии баргузории семинар ибрози андеша кард.  Зикр шуд, ки имрӯзҳо дар хоҷагиҳои гулпарварии вилоят барои парвариши гулҳо, зиёд намудани навъу намудҳои гулҳои зебои ороишӣ ва ба мизоҷону меҳмонон пешниҳод намудани онҳо тадбирҳои зиёд андешида мешаванд.

Бо мақсади майян намудани корхонаҳои фаъолу пешсаф аз тарафи раиси Корхонаи воҳиди давлатии «Хоҷагии манзилӣ ва коммуналӣ»-и Ҷумҳурии Тоҷикистон озмуни гулпарварӣ эълон гардида, ба ҳамаи роҳбарони корхонаҳои зертобеъ вобаста ба масъалаи мазкур супориш дода шуд. Ғайр аз ин зимни семинар барои пешбурди кор ва ислоҳи камбудиҳо тавсияву маслиҳатҳои муфид дода шуд.

Дар қисмати дигари семинари омӯзишии вилоятӣ иштирокдорон бо корҳои амалии Корхонаи давлатии фаръии «Обтаъминкунӣ ва корез»-и шаҳри Бохтар шинос гардиданд.